აშშ-ის სახელმწიფო მდივანმა, ენტონი ბლინკენმა დაგმო რუსეთის ძალების მიერ განხორციელებული სარაკეტო თავდასხმა ჩერნიგოვის ცენტრზე, რომლის შედეგადაც, სულ მცირე, 148 ადამიანი დაშავდა, ხოლო შვიდი დაიღუპა.

„ჩვენ სასტიკად ვგმობთ კიდევ ერთ საზარელ სარაკეტო თავდასხმას ჩერნიგოვში უდანაშაულო მშვიდობიანი მოსახლეობის წინააღმდეგ. ჩვენ ვგლოვობთ ამ ტრაგიკული დანაკარგის გამო და ჩვენი გული დაღუპულთა ოჯახებთანაა. აშშ ყოველთვის იქნება უკრაინელი ხალხის გვერდით. რუსეთმა ახლავე უნდა დაასრულოს თავისი სასტიკი ომი“, – წერს ბლინკენი.

აღნიშნული ფაქტი დაგმო უკრაინაში აშშ-ის ელჩმა ბრიჯიტ ბრინკმაც.

"შეძრწუნებული ვარ ჩერნიგოვის ისტორიულ ცენტრზე დღეს განხორციელებული თავდასხმის გამო. არასოდეს უნდა მოხდეს ის ფაქტი, რომ უდანაშაულო კაცების, ქალებისა და ბავშვებისთვის, რომლებიც მშვენიერი შაბათით ტკბებოდნენ, დღე დაჭრით ან მოკვლით დასრულდეს. რუსეთის სარაკეტო და უპილოტო დარტყმები უკრაინის ქალაქებზე, პორტებსა და მოსახლეობაზე ასახავს იმ სიღრმეებს, რომლებშიც რუსეთი ჩაიძირა და ის უნდა შეჩერდეს. ჩვენ უკრაინელ ხალხთან ერთად ვგლოვობთ ამ ტრაგედიას", - წერს ბრიჯიტ ბრინკი.

ჩერნიგოვის რეგიონის სამხედრო ადმინისტრაციის ხელმძღვანელმა, ვიაჩესლავ ჩაუსმა განაცხადა, რომ ჩერნიგოვზე რუსული ბალისტიკური რაკეტის თავდასხმის შედეგად დაშავებულთა რიცხვი 148-მდე გაიზარდა. გავრცელებული ინფორმაციით, რუსულმა ძალებმა ბალისტიკური რაკეტით დარტყმა ჩერნიგოვის ცენტრში დრამატულ თეატრზე განახორციელეს.