კიევში ოფიციალური ვიზიტით მყოფი აშშ-ის სახელმწიფო მდივანი ენტონი ბლინკენი უკრაინის პრეზიდენტს, ვოლოდიმირ ზელენსკის შეხვდა. ამის შესახებ ინფორმაციას სახელმწიფო დეპარტამენტის პრესსამსახური ავრცელებს.

როგორც ენტონი ბლინკენმა განაცხადა, მას უკრაინაში ჩასვლა და "მტკიცე მხარდაჭერის დადასტურება" აშშ-ის პრეზიდენტმა, ჯო ბაიდენმა სთხოვა. მისივე თქმით, აშშ სხვა ქვეყნებთან ერთად აძლიერებენ ძალისხმევას „კონტრშეტევის დაუყოვნებელი გამოწვევების გადასაჭრელად“.

„ვიცით, რომ წინა დღით ფრონტის ხაზზე იყავით და ჩვენ, ყველას, დიდი სურვილი გვაქვს მოვისმინოთ თქვენი შეფასება. რა თქმა უნდა, ვხედავთ იმ მნიშვნელოვან პროგრესს, რომელიც კონტრშეტევაში მიღწეულია და ეს ძალიან, ძალიან გამამხნევებელია“, – აღნიშნა სახელმწიფო მდივანმა.

ბლინკენმა ასევე აღნიშნა, რომ ჯო ბაიდენი უახლოეს მომავალში მოუთმენლად ელის ზელენსკისთან შეხვედრას.

თავის მხრივ, ზელენსკიმ მადლობა გადაუხადა აშშ-ის სახელმწიფო მდივანს ვიზიტისთვის და ხაზი გაუსვა ფართომასშტაბიანი ომის დროს ამ ვიზიტის მნიშვნელობას.

ენტონი ბლინკენი ოფიციალური ვიზიტით კიევში 6 სექტემბერს ჩავიდა. მედიის ცნობით, სახელმწიფო მდივანი უკრაინაში ორი დღის განმავლობაში იქნება.