ენტონი ბლინკენმა კონგრესს მოუწოდა, დაუყოვნებლივ დაუჭირონ მხარი ჯო ბაიდენის მოთხოვნას უკრაინისთვის დამატებით 24,1 მილიარდი დოლარის გამოყოფის თაობაზე
![erimedia_ravk/7XMXgRRIR.jpeg](https://cdn.u.media/max/w728/erimedia_ravk/7XMXgRRIR.jpeg)
აშშ-ის სახელმწიფო მდივანმა, ენტონი ბლინკენმა კონგრესს მოუწოდა, დაუყოვნებლივ დაუჭირონ მხარი ჯო ბაიდენის მოთხოვნას უკრაინისთვის დამატებით 24,1 მილიარდი დოლარის გამოყოფის თაობაზე. ამის შესახებ მან სახელმწიფო დეპარტამენტში გამართულ ბრიფინგზე განაცხადა.
„მომდევნო კვირაში შესრულდება წელიწადნახევარი რუსეთის უკრაინაში შეჭრიდან. უკრაინული სკოლებისა და საავადმყოფოების დაბომბვები, საკვებისა და საწვავის იარაღად გამოყენება, მოკლული და დაჭრილი ათასობით უკრაინელი... მთელი ამ დროის განმავლობაში უკრაინელები აჩვენებდნენ წარმოუდგენელ სიმამაცესა და სიმტკიცეს. გასულ კვირაში ჯო ბაიდენმა მოითხოვა 24,1 მილიარდი დოლარი, რათა გაგრძელდეს უკრაინის უსაფრთხოების, ეკონომიკის, ჰუმანიტარული საჭიროებების მხარდაჭერა. ჩვენი ძალისხმევისა და რესურსების დახმარებით, უკრაინელებმა შეძლეს საკუთარი სიცოცხლის, თავისუფლებისა და მომავლისთვის ბრძოლა. ამის შედეგია ის, რომ რუსეთის შეჭრა სტრატეგიულ ჩავარდნად იქცა. მოვუწოდებ კონგრესს დაუყოვნებლივ დაუჭიროს მხარი დამატებითი დაფინანსების გამოყოფის მოთხოვნას“, - აცხადებს ბლინკენი.