ერევანში, საპროტესტო აქციის მონაწილეებმა დეპუტატებს პარლამენტში მოსვლისკენ და ნიკოლ ფაშინიანისთვის იმპიჩმენტის გამოცხადებისკენ მოუწოდეს
15 სექტემბერი, 2022
ერევანში, საპროტესტო აქციის მონაწილეებმა დეპუტატებს პარლამენტში მოსვლისკენ და ნიკოლ ფაშინიანისთვის იმპიჩმენტის გამოცხადებისკენ მოუწოდეს.
„ველოდებით დეპუტატებს. ისინი უნდა მოვიდნენ პარლამენტში და ხელი მოაწერონ დოკუმენტებს იმპიჩმენტის გამოცხადებისთვის“, - განაცხადა აქციის ერთ-ერთმა ორგანიზატორმა, კარინ ტონოიანმა.
აქციის მონაწილეები ნიკოლ ფაშინიანის პარლამენტში გამოსვლას აპროტესტესტებენ.
ნიკოლ ფაშინიანმა პარლამენტში გამოსვლის დროს აღნიშნა, რომ ქვეყანაში მშვიდობის უზრუნველყოფის მიზნით, რთული გადაწყვეტილებების მისაღებად მზად არის.
თავის მხრივ, ნიკოლ ფაშინიანი გავრცელებულ ინფორმაციას უარყოფს, რომლის მიხედვითაც, თითქოს სომხეთმა აზერბაიჯანთან მთიანი ყარაბაღის დათმობის შესახებ შეთანხმებას ხელი მოაწერა.
„ძვირფასო თანამემამულენო, მოგიწოდებთ, არ დაემორჩილოთ მანიპულირებას. არცერთი დოკუმენტი არ არის ხელმოწერილი და არც მზადდება ხელმოწერისთვის. ეს არის საინფორმაციო დივერსია, რომელსაც მიმართავენ არამეგობრული გარე ძალები, რათა დაარღვიონ ქვეყნის იმუნიტეტი“, - აღნიშნა ნიკოლ ფშინიანმა.
მანამდე სომხეთის პარლამენტში სიტყვით გამოსვლისას სომხეთის პრემიერ-მინისტრმა განაცხადა:
„ჩვენ გვინდა, ხელი მოვაწეროთ დოკუმენტს, რის შედეგადაც ჩვენ გაგვაკრიტიკებენ, შეურაცხყოფას მოგვაყენებენ, მოღალატეებს გვიწოდებენ, ხალხმა შეიძლება ჩვენი ხელისუფლებიდან ჩამოშორებაც კი გადაწყვიტოს. მადლიერები ვიქნებით, თუ შედეგად სომხეთი, რომლის ფართობიც 29 800 კვადრატული კილომეტრია, გრძელვადიან მშვიდობას და უსაფრთხოებას მიიღებს. მე ძალიან მკაფიოდ ვამბობ, რომ ხელს მოვაწერ გადაწყვეტილებას, რომელიც ამას უზრუნველყოფს. არ მაინტერესებს, მე რა მომივა, მე მაინტერესებს, რა დაემართება სომხეთის რესპუბლიკას“.
