ერევანში რუსეთის საელჩოს შენობასთან უსაფრთხოების ზომები გაძლიერდა, ამდროისათვის იქ 20-მდე პოლიციელი დგას.

დიპლომატიური მისიის წინ პოლიციის რამდენიმე მსუბუქი ავტომობილი და გაძლიერებული დაცვა დგას. გარდა ამისა, საელჩოსთან ასევე იმყოფება ადგილობრივი ახალგაზრდების მცირე ჯგუფი.

გუშინ, ყარაბაღში ვითარების გამწვავების ფონზე, ერევანში საპროტესტო აქციები დაიწყო. მოქალაქეები, მთავრობის სახლის გარდა, ასევე შეიკრიბნენ რუსეთის საელჩოს წინ. აქციის მონაწილეებმა თავდაპირველად ნაწილობრივ, შემდეგ კი სრულად დაბლოკეს რუსული დიპმისია. რუსეთის საელჩომ ნოტა გაუგზავნა სომხეთის საგარეო საქმეთა სამინისტროს და დიპმისიის მუშაობის აღსადგენად ზომების მიღება მოსთხოვა.

შეკრებილები რუსეთისგან მთიან ყარაბაღში ვითარების დარეგულირებას მოითხოვდნენ. ადგილზე ისმოდა ანტირუსული ლოზუნგები და შეძახილები. მოგვიანებით აქციის მონაწილეებსა და ძალოვნებს შორის შეჯახება მოხდა, რა დროსაც რამდენიმე მოქალაქე დააკავეს. საბოლოოდ პოლიციამ შენობის განბლოკვა მოახერხა.

აზერბაიჯანმა ყარაბაღში „ლოკალური ხასიათის ანტიტერორისტული ღონისძიებები“ სამშაბათს, 19 სექტემბერს დაიწყო კონსტიტუციური წესრიგის აღდგენის მიზნით. ბაქოს განცხადებით, აღნიშნულიღონისძიებებისფარგლებში გამოიყენება მაღალი სიზუსტის იარაღი, რომელსაც მწყობრიდან გამოჰყავს სომხეთის შეიარაღებული ძალების ფორმირებების პოზიციები, მათი საცეცხლე წერტილები, ასევე საბრძოლო საშუალებები და სამხედრო დანიშნულების ობიექტები, ხოლო სამოქალაქო მოსახლეობასა და ინფრასტრუქტურულ ობიექტებზე შეტევები არ ხორციელდება.

ერევანში ბაქოს ნაბიჯები „ცეცხლის შეწყვეტის რეჟიმის დაარღვევად“ და ბაქოს „აგრესიულ ნაბიჯებად“ შეაფასეს და განაცხადეს, რომ სომხეთს მთიან ყარაბაღში სამხედრო ძალები არ ჰყავს.