დიმიტრი შევარდნაძის სახელობის ეროვნულ გალერეაში მხატვარ ნინიკო მორბედაძის ყველაზე მასშტაბური პერსონალური გამოფენა გაიხსნა, რომელიც ხელოვანის შემოქმედების მიმოხილვას წარმოადგენს და 1989 წლიდან დღემდე 100-ზე მეტ ნამუშევარს მოიცავს.

გამოფენის გახსნას მხატვრის მეგობრები და სახელოვნებო სფეროს წარმომადგენლები ესწრებოდნენ.

ნინიკო მორბედაძემ დაამთავრა თბილისის სახელმწიფო სამხატვრო აკადემია გრაფიკოსის სპეციალობით. 2020 წელს საერთაშორისო აუქციონზე შედგა მხატვრის დებიუტი. ლონდონში, „ფილიპსის“ აუქციონზე, შეიძინეს მისი ტილო „დროის ფარგლებს გარეთ“. ის 2021 წელსაც წარმატებით მონაწილეობდა „ფილიპსის“ აუქციონში „XX საუკუნისა და თანამედროვე ხელოვნება“, რომელზეც გაიყიდა მისი სურათი „ზღაპარი“. თავისი კარიერის განმავლობაში ნინიკო მორბედაძე აქტიურად მუშაობდა კინოს მხატვრად რეჟისორებთან მიხეილ კობახიძესთან, ბესარიონ გიორგობიანთან, ნოდარ მანაგაძესა და გიგა აგლაძესთან ერთად. მან იმუშავა ფილმზე „სხვა მე“, რომლის რეჟისორი გიგა აგლაძე გახლდათ, ხოლო აღმასრულებელი პროდიუსერი დევიდ ლინჩი იყო.

ნინიკო მორბედაძის ათი ტილო ნიუ-ჯერსის (აშშ) ზიმერლის ხელოვნების მუზეუმში, ნორტონ და ნენსი დოჯების კოლექციაშია დაცული. მისი ნამუშევრები ასევე ინახება საქართველოს, ევროპისა და აშშ-ის კერძო კოლექციებში.

გამოფენის წარმდგენია თანამედროვე ხელოვნების გალერეა ,,სიეიჩ 64“.

კურატორი - გალერეა 64-ის თანადამფუძნებელი და დირექტორი, სალომე პაპაშვილი.

დამთვალიერებელს გამოფენის ნახვა 15 ოქტომბრის ჩათვლით შეუძლია.