ესტონეთის პრემიერ მინისტრი - პუტინმა თვალი დაადგა მოლდოვას და მიზანში აქვს ამოღებული საქართველო, მისი შეჩერების ერთადერთი გზა უკრაინის დახმარებაა
რუსეთის წინააღმდეგ სანქციების დაწესება ევროკავშირისთვის სულ უფრო რთული ხდება, – ამის შესახებ ესტონეთის პრემიერ-მინისტრმა, კაია კალასმა განცხადება ბრიტანულ „ტელეგრაფთან“ ინტერვიუში გააკეთა.
კაია კალასის განცხადებით, ამის მიზეზი ომისგან დაღლილობა და ის პრობლემებია, რომელებიც გამოაშკარავდა.
„ახლა ძალიან ცოტა ისეთი ელემენტია დარჩენილი, რის წინააღმდეგაც სანქციების დაწესება შეგვიძლია. ამაშია პრობლემა“, – განაცხადა ესტონეთის პრემიერ-მინისტრმა.
ამასთან, ესტონეთის მთავრობის მეთაურის თქმით, აუცილებელია რუსეთზე ზეწოლა შენარჩუნდეს, რათა მან სხვა ქვეყნების დაპყრობაც არ გადაწყვიტოს.
"უკრაინის შემდეგ პუტინმა თვალი დაადგა მოლდოვას, მიზანში ამოიღო საქართველო, ბალტიისპირეთის ქვეყნები. პუტინს ეს არასდროს დაუმალავს. მის შესაჩერებლად ერთადერთი გზა უკრაინის დახმარებაა, რომ ეს ომი მოიგოს“, – აცხადებს კაია კალასი.
მისივე თქმით, ევროპის წინააღმდეგ ჰიბრიდულ იარაღად რუსეთს შეუძლია თავისი ქვეყნის ის მოქალაქეები გამოიყენოს, რომლებიც სამხედრო გაწვევისთვის თავის არიდების მიზნით რუსეთს ტოვებენ.
გასულ კვირას ევროკავშირმა რუსეთს სანქციების ახალი პაკეტი დაუწესა.