ეუთო - უკრაინის ტერიტორიის უკანონო ანექსია ომის ესკალაციას გამოიწვევს
ევროპის უსაფრთხოებისა და თანამშრომლობის ორგანიზაციამ რუსეთის მიერ უკრაინის ტერიტორიის უკანონო ანექსია დაგმო და მას "საერთაშორისო სამართლის ფუნდამენტური წესების, ეუთოს პრინციპებისა და გაეროს წესდების აშკარა დარღვევა" უწოდა.
"რუსეთის ფედერაციის ეს ქმედება, რომელიც სამხედრო მობილიზაციას და უპასუხისმგებლო ბირთვულ საფრთხეებს მოიცავს, მხოლოდ კონფლიქტის ესკალაციას გამოიწვევს, კიდევ მილიონობით ადამიანის სიცოცხლეს ჩააგდებს საფრთხეში და უფრო მეტ ადამიანს დატანჯავს", - ნათქვამია განცხადებაში.
ეუთოს განცხადებას, რომელიც პარასკევს გავრცელდა, ხელი მოაწერეს ეუთოს მოქმედმა თავმჯდომარემ და პოლონეთის საგარეო საქმეთა მინისტრმა - ზბიგნევ რაუმ, ეუთოს საპარლამენტო ასამბლეის პრეზიდენტმა - მარგარეტა სედერფელტმა, ეუთოს გენერალურმა მდივანმა - ჰელგა მარია შმიდმა და ეუთოს საპარლამენტო ასამბლეის გენერალურმა მდივანმა - რობერტო მონტელამ.