ევროკავშირის დროშის დაწვის საქმეზე დაპატიმრებული ლაშა შარუხია გირაოთი გაათავისუფლეს
ლაშა შარუხიას, რომელსაც მცხეთის მერიის შენობიდან ევროკავშირის დროშის ჩამოხსნის და დაწვის საქმეზე ედება ბრალი, სასამართლომ აღკვეთის ღონისძიების სახით შეფარდებული პატიმრობა გირაოთი (2000 ლარი) შეუცვალა.
შარუხიას გათავისუფლებას სასამართლოს დარბაზში ოვაციებით შეხვდნენ. ბრალდებულის მხარდასაჭერად ხალხი სასამართლოს შენობის გარეთაც იყო შეკრებილი.
პროცესის შემდეგ ადვოკატმა სერგი ხურციძემ თქვა, რომ „თვე-ნახევრიანი ბრძოლა, რაც გაიმართა საზოგადოებასა და სახელმწიფო ბრალდებას შორის, დასრულდა იმით, რომ სახელმწიფოს მოუწია გარკვეული ნაბიჯების გადადგმა. ჩვენც, რა თქმა უნდა, საფუძველი მივეცით მტკიცებულებების წარდგენით. შესაბამისად, მოხდა ის, რომ ეს ადამიანი დღეს არის თავისუფლებაში".
საქმის არსებითი განხილვა 16 თებერვალს, 12:00 საათზე, მცხეთის რაიონულ სასამართლოში დაინიშნება. ბრალდებული ვალდებულია სასამართლო პროცესზე გამოცხადდეს.
პროკურატურის განმარტებით, შარუხიას ბრალი ედება სხვისი ქონების დაზიანების [სისხლის სამართლის კოდექსის 187-ე მუხლი] ფაქტზე, რაც სასჯელის სახედ და ზომად 3-დან 6 წლამდე თავისუფლების აღკვეთას ითვალისწინებს.