ყურადღებით ვაკვირდებით ევროკავშირის რეკომენდაციების შესრულების პროცესს, განაცხადა ევროკავშირის ელჩმა საქართველოში პაველ ჰერჩინსკიმ.

მას იმედი აქვს, რომ პროცესი ჩატარდება ყველა დაინტერესებული მხარის, მათ შორის ოპოზიციური პარტიების მონაწილეობით.

"ვიცი, რომ ქართულმა მხარემ საკუთარ თავს დაუწესა ძალიან მჭიდრო ვადები. გუშინ მქონდა რამდენიმე შეხვედრა საქართველოს პარლამენტში, ხვალაც მივალ პარლამენტში. რასაკვირველია, ჩვენ ყურადღებით ვაკვირდებით ამ ყველაფერს და იმედი გვაქვს, რომ პროცესი ჩატარდება ძალიან ინკლუზიურად და გამჭვირვალედ, ყველა დაინტერესებული მხარის, მათ შორის ოპოზიციური პარტიების მონაწილეობით და მათ უნდა იმუშაონ ძალიან კონსტრუქციულად", - განაცხადა ელჩმა.

ჰერჩინსკის თქმით, შეფასების პროცესი მომავალ წელს განხორციელდება. პირველი შეფასება იქნება ევროკომისიისგან, შემდეგ კი მას განიხილავენ ევროპელი ლიდერები და შემდეგ მიიღება გადაწყვეტილება რა იქნება შემდგომი ნაბიჯები საქართველოს ევროპული ინტეგრაციის გზაზე.