ევროკომისია უკრაინისთვის დამატებით ხუთი მილიარდი ევროს გამოყოფას გეგმავს
6 სექტემბერი, 2022
ევროკომისია უკრაინისთვის მაკროფინანსური დახმარების სახით დამატებით ხუთი მილიარდი ევროს გამოყოფის შეთავაზებით გამოვა. ამის შესახებ ევროკომისიის პრეზიდენტმა, ურსულა ფონ დერ ლაიენმა სოციალურ ქსელ „ტვიტერში“ უკრაინის პრემიერ-მინისტრთან, დენის შმიგალთან შეხვედრის შემდეგ დაწერა.
„სიტუაცია უკრაინაში კვლავ საჭიროებს ჩვენს ურყევ მხარდაჭერას. ამ დრომდე გამოყოფილ 10 მილიარდ ევროსთან ერთად, ჩვენ მიმდინარე კვირას შევთავაზებთ მაკროფინანსური დახმარების სახით დამატებით 5 მილიარდ ევროს“, – წერს ურსულა ფონ დერ ლაიენი „ტვიტერში“.
დენის შმიგალი ურსულა ფონ დერ ლაიენს ბრიუსელში 5 სექტემბერს გამართული უკრაინა-ევროკავშირის ასოცირების საბჭოს ფარგლებში შეხვდა. შეხვედრის შემდეგ, შმიგალმა აღნიშნა, რომ უკრაინას ევროკავშირთან პირველი ოქტომბრიდან შემსუბუქებული საბაჟო რეჟიმი ექნება. მან მადლობა გადაუხადა ურსულა ფონ დერ ლაიენს უკრაინის დახმარების საკითხებში მუდმივი ჩართულობისთვის.
