ევროკომისიამ „დემოკრატიის დაცვის პაკეტი“ წარადგინა, რომელიც უცხოური გავლენების შესახებ კანონპროექტს მოიცავს. საკანონმდებლო ინიციატივა ბრიუსელში ღირებულებებისა და გამჭვირვალობის საკითხებში ევროკომისიის ვიცე-პრეზიდენტმა, ვერა იუროვამ და ევროკომისიის ვიცე-პრეზიდენტმა, დემოგრაფიისა და დემოკრატიის საკითხებში ევროკომისარმა, დუბრავკა შუიცამ წარადგინეს.

როგორც ევროკომისიის ოფიციალურ ვებგვერდზეა აღნიშნული, ევროპულმა კომისიამ დემოკრატიის დაცვის პაკეტი 2024 წლის ევროპული არჩევნების წინ მიიღო. ამ პაკეტის ცენტრალური ნაწილია საკანონმდებლო წინადადება, რომელიც გააძლიერებს ინტერესთა წარმომადგენლობის საქმიანობის გამჭვირვალობას და დემოკრატიულ ანგარიშვალდებულებას მესამე ქვეყნების სახელით, რომლებიც მიმართულია პოლიტიკაზე, გადაწყვეტილების მიღებასა და დემოკრატიულ სივრცეზე ზემოქმედებისკენ. იგი ასევე მოიცავს ორ რეკომენდაციას, რომლებიც მიზნად ისახავს ხელი შეუწყოს თავისუფალი, სამართლიანი და მდგრადი არჩევნების ჩატარებას და მოქალაქეებისა და სამოქალაქო საზოგადოების მონაწილეობას პოლიტიკის შემუშავებაში.

ევროკომისია აღნიშნავს, რომ პაკეტის მიზანია უცხოური გავლენის საფრთხესთან გამკლავება მეტი გამჭვირვალობის საშუალებით და ამავე დროს დემოკრატიებში მოქალაქეების მონაწილეობისა და სამოქალაქო ჩართულობის წახალისება. „ევრობარომეტრის“ მიერ ჩატარებული ბოლო კვლევა აჩვენებს, რომ ევროპელების 81%-ს სჯერა, რომ უცხოური ჩარევა დემოკრატიულ სისტემებში არის სერიოზული პრობლემა და საჭიროებს რეაგირებას.

„დადგა ფარული უცხოური გავლენის გამოაშკარავების დრო“, – აღნიშნულია ევროკომისიის პრესრელიზში.

ამასთან, პრესკონფერენციაზე ევროკომისიის ვიცე-პრეზიდენტმა, ვერა იოროვამ განაცხადა, რომ წარდგენილი კანონპროექტი არ არის ე.წ. უცხოური აგენტების შესახებ კანონპროექტი.

„ეს არ არის ე.წ. უცხოური აგენტების შესახებ კანონი. ის არ ითვალისწინებს სისხლის სამართლის სანქციებს, რამე საქმიანობის აკრძალვას ან რაიმე სახის დისკრიმინაციული იარლიყების მიკუთვნების შესაძლებლობას. ასე რომ, ამ ინიციატივით, ჩვენ ვადგენთ დემოკრატიულ სტანდარტს ამ საკითხზე რეაგირებისთვის საკუთარი თავის ჩაკეტვის ან რამე საქმიანობის შეზღუდვის გარეშე“, – აღნიშნა იუროვამ.

მისი თქმით, ევროკავშირი ვერ უგულვებელჰყოფს იმ რისკებს, რომლებიც დემოკრატიას გარედან ემუქრება.

„დემოკრატია ევროპაში არის მდგრადი, თუმცა ის საჭიროებს მუდმივ ზრუნვასა და დაცვას არა მხოლოდ ევროკავშირის ინსტიტუტების, არამედ ყველა ჩვენგანის, განსაკუთრებით, მოქალაქეების მხრიდან. ჩვენი მიზანია, მეტი ინსტრუმენტი მივცეთ მათ, ვინც ზრუნავს დემოკრატიაზე, რათა კონტროლი და ბალანსი იყოს უფრო ეფექტიანი. ჩვენ ვერ უგულებელვყოფთ იმ რისკებს, რომლებიც დემოკრატიას გარედან ემუქრება“, – განაცხადა ევროკომისიის ვიცე-პრეზიდენტმა, ვერა იუროვამ.

ამასთან, ევროკომისიის მიერ წარდგენილი ინიციატივა ითვალისწინებს გამჭვირვალობის რამდენიმე მოთხოვნას, მათ შორის გამჭვირვალობის რეესტრში რეგისტრაციას. რეგისტრაცია მოეთხოვება ყველა სუბიექტს, რომლის საქმიანობა უკავშირდება მესამე ქვეყნის ინტერესების წარმოდგენას. ევროკავშირის წევრმა სახელმწიფოებმა უნდა შექმნან ან განაახლონ არსებული ეროვნულ რეესტრები ამ მიზნისთვის. ამასთან, კანონპროექტი ითვალისწინებს ამგვარი სუბიექტების საქმიანობასთან დაკავშირებული მონაცემების ძირითადი ელემენტების, კერძოდ, მიღებული წლიური თანხის, დაინტერესებული მესამე ქვეყნებისა და საქმიანობის მთავარი მიზნების გასაჯაროებას.

„ამ წინადადებით, ევროკომისია მიისწრაფვის, წვლილი შეიტანოს არა მხოლოდ ევროკავშირში, არამედ გლობალური მასშტაბით სტანდარტების ჩამოყალიბებაში იმასთან დაკავშირებით, როგორ გავუმკლავდეთ უცხოურ გავლენას რაციონალური და პროპორციული გზით, ფუნდამენტური უფლებების სრული პატივისცემით“, – ნათქვამია ევროკომისიის პრესრელიზში.