ევროკომისიის რეკომენდაციებს ოპოზიციაში არაერთგვაროვანი შეფასებები მოჰყვა. „ევროპამ კიდევ ერთხელ დაადასტურა, რომ ევროპულ სახლშია ჩვენი ადგილი, მაგრამ რუსებით ვერ შევალთ მაგ სახლში“, - აცხადებს პარტია „ლელოს“ წევრი სალომე სამადაშვილი.

„ევროკავშირის წევრობის კანდიდატის სტატუსის საბოლოოდ მიღების შემთხვევაშიც კი, ივანიშვილის რეჟიმის პირობებში ჩვენ, რეალურად კი არ ვუახლოვდებით, არამედ ვშორდებით ევროპას, დასავლეთს“, - ამბობს „ევროპული საქართველოს“ წევრი გიგა ბოკერია.

„ნაციონალური მოძრაობის“ წევრ თინა ბოკუჩავასა და პარტია „საქართველოსთვის“ წევრ ანა ბუჩუკურს მიაჩნიათ, რომ ევროკავშირმა ეს შანსი ქართველ ხალხს მისცა.

განსხვავებული პოზიცია აქვს გიორგი ვაშაძეს. ის თვლის, რომ ევროკომისიის რეკომენდაცია ოპოზიციისა და სამოქალაქო საზოგადოების დამსახურებაა.

„ოპოზიცია, ყოჩაღ! სამოქალაქო საზოგადოება, ყოჩაღ! ოპოზიცია ხუთიანი, „ქართული ოცნება“ დაჯექი, ორიანი. ხელისუფლებას არ უხარია კანდიდატის სტატუსი“, - განაცხადა „სტრატეგია აღმაშენებლის“ ლიდერმა გიორგი ვაშაძემ.

ევროკომისიამ საქართველოსთვის კანდიდატის სტატუსის მინიჭების რეკომენდაცია გასცა.