გაერო-ს გენერალურმა მდივანმა, ანტონიო გუტერეშმა განაცხადა, რომ რუსეთის საგარეო საქმეთა მინისტრს, სერგეი ლავროვს კონკრეტული წინადადებები გაუგზავნა, რომელიც მიზნად ისახავს შავი ზღვის მარცვლეულის შეთანხმების აღდგენას.

რუსეთმა მარცვლეულის შეთანხმება ივლისში დატოვა და განაცხადა, რომ მისი მოთხოვნები საკუთარი სურსათისა და სასუქების ექსპორტის გასაუმჯობესებლად არ დაკმაყოფილდა.

„მივიჩნევ, რომ ჩვენ წარმოვადგინეთ წინადადება, რომელიც შეიძლება იყოს [შეთანხმების] განახლების საფუძველი, მაგრამ განახლება, რომელიც უნდა იყოს სტაბილური. არ შეიძლება გვქონდეს შეთანხმება, რომელიც მუდმივად კრიზისშია. ჩვენ უნდა გვქონდეს ისეთი რამ, რაც მუშაობს და ყველასთვის სასარგებლო იქნება“, - განუცხადა გუტერეშმა ჟურნალისტებს.