ისრაელის სამხედრო ოპერაციას ღაზის სექტორში 7 ოქტომბრის შემდეგ 40 000-ზე მეტი ადამიანი ემსხვერპლა. ამის შესახებ ინფორმაციას ღაზის სექტორის ჯანდაცვის სამსახური ავრცელებს.

უწყების ცნობით, ეს რიცხვი უდრის ტერიტორიაზე მცხოვრები 2.3-მილიონიანი მოსახლეობის დაახლოებით 1.7 პროცენტს. დაღუპულთა უმრავლესობა ბავშვები, ქალები ან მოხუცები არიან.

მიმდინარე თვეში ისრაელის სამხედროებმა განაცხადეს, რომ ომის დროს 15 000-ზე მეტი ტერორისტი მოკლეს. რამდენიმე ექსპერტის თქმით, ღაზაში უშუალოდ ომის შედეგად დაღუპულთა რეალური რაოდენობა, სავარაუდოდ, გაცილებით მეტი იქნება. ადგილობრივი პირების შეფასებით, დაახლოებით 10 000 ცხედარი რჩება შენობების ნანგრევების ქვეშ, რომლებიც ისრაელის საჰაერო თავდასხმების შედეგად დაზიანდა.

არაბულ ანკლავში აცხადებენ, რომ ამავე პერიოდის განმავლობაში ისრაელის სამხედრო ოპერაციის შედეგად 92 401 ადამიანი დაშავდა. მსხვერპლის გარდა, სატელიტური სურათების ანალიზი აჩვენებს, რომ ღაზაში შენობების თითქმის 60 პროცენტი დაზიანდა ან განადგურდა. ბოლო რამდენიმე თვის განმავლობაში სამხრეთით მდებარე ქალაქ რაფაჰს ყველაზე დიდი ზიანი მიადგა.

ცნობისთვის, ღაზის სექტორში ომი მას შემდეგ დაიწყო, რაც 7 ოქტომბერს „ჰამასის“ ათასობით მებრძოლი ისრაელის სამხრეთში შეიჭრა. ისრაელის მხარის მონაცემებით, ოპერაციის შედეგად დაიღუპა დაახლოებით 1 200 ადამიანი, 251 კი მძევლად აიყვანეს.