"გაზპრომი" წყვეტს რუსული გაზის იტალიისთვის მიწოდებას, რაც ევროპაში ენერგო კრიზისს კიდევ უფრო გააძლიერებს. ამის შესახებ Bloomberg წერს.

„დღეის მდგომარეობით „გაზპრომი“ აღარ აწვდის გაზს Eni-ს“, - განაცხადა იტალიის უმსხვილესი ნავთობკომპანიის Eni SpA-ს წარმომადგენელმა.

"გაზპრომი" იტალიას იმ მილსადენის საშუალებით ამარაგებს, რომელიც ავსტრიაზე გადის. როგორც ჩანს, ბუნებრივი აირის მიწოდება მხოლოდ იტალიას შეუწყდა, ვინაიდან ავსტრიას გაზი კვლავ მიეწოდება.

"გაზპრომმა" შაბათს განცხადება გაავრცელა, სადაც ნათქვამია, რომ მან შეაჩერა ავსტრიის გავლით იტალიაში გაზის მიწოდება, ვინაიდან, სექტემბრის ბოლოს ავსტრიაში განხორციელებული მარეგულირებელი ცვლილებების შემდეგ, ავსტრიულმა ოპერატორმა უარი თქვა „სატრანსპორტო ნომინაციების“ დადასტურებაზე. "გაზპრომის" თქმით, ისინი იტალიურ მხარესთან ერთად მუშაობენ ამ საკითხის გადასაჭრელად. Eni-მ თავის მხრივ დაადასტურა, რომ პრობლემის მოსაგვარებლად "გაზპრომს" მიმართა. ავსტრიის ენერგო მარეგულირებელს E-control-ს ელექტრონული წერილისთვის, რომლითაც მას აღნიშნულ საკითხზე კომენტარი სთხოვეს, დაუყოვნებლივ არ უპასუხია.