თუ საბოლოო მიზანი თავისუფალი, დამოუკიდებელი, სუვერენული უკრაინაა, რომლის ტერიტორიაც ხელუხლებელია, ამ მიზნის მისაღწევად საკმაოდ დიდი ძალისხმევა იქნება საჭირო. ეს არის ხანგრძლივი, ძალიან რთული ომი, რომელსაც დიდი დანაკარგები მოჰყვება. ამ მიზნების მიღწევა სამხედრო საშუალებებით შეიძლება, რაც დიდ დროს წაიღებს, თუმცა ამ მიზნების მიღწევა ასევე შესაძლებელია დიპლომატიური მეთოდებით, - ამის შესახებ აშშ-ის შეიარაღებული ძალების მეთაურთა გაერთიანებული კომიტეტის ხელმძღვანელმა, გენერალმა მარკ მილიმ The Washington Post-ს განუცხადა.

„მე თავიდანვე ვმონაწილეობდი გადაწყვეტილებების მიღების პროცესში, ჯერ კიდევ უკრაინაში რუსეთის შეჭრამდე, და არანაირი შეფერხება მიწოდების მხრივ არ ყოფილა. უკრაინას მივაწოდეთ ძალიან ბევრი შეიარაღება, ტექნიკა, საბრძოლო მასალები, გარდა ამისა, აღმოვუჩინეთ ძალიან დიდი არასამხედრო ტიპის დახმარება. ასე რომ, საჭირო დროს უკრაინას მივაწოდეთ საჭირო რაოდენობის აღჭურვილობა, რაც მათ კონკრეტულ მომენტში არსებული მიზნების მისაღწევად სჭირდებოდათ. რაც შეეხება კონტრიერიშს, რამდენიმე თვის წინ მე ვთქვი, რომ ეს იერიში იქნებოდა ხანგრძლივი და სისხლიანი - სწორედ ამას ვხედავთ ახლა“, - აცხადებს მარკ მილი.

კითხვაზე, გაიმარჯვებს თუ არა უკრაინა, მარკ მილიმ განაცხადა, რომ ეს დამოკიდებულია იმაზე, რა იგულისხმება „გამარჯვებაში“.

„უკრაინისთვის ეს არის ეგზისტენციური ბრძოლა, ბრძოლა გადარჩენისთვის. თუმცა ევროპისათვის და დანარჩენი მსოფლიოსთვის ეს არის ბრძოლა იმისთვის, რომ არსებული წესები კვლავაც მოქმედებდეს. პუტინმა პირდაპირ დაარღვია საერთაშორისო წესრიგის ნორმები, რომლებიც მეორე მსოფლიო ომის შემდეგ ჩამოყალიბდა. თუ საბოლოო მიზანი თავისუფალი, დამოუკიდებელი, სუვერენული უკრაინაა, რომლის ტერიტორიაც ხელუხლებელია, ამ მიზნის მისაღწევად საკმაოდ დიდი ძალისხმევა იქნება საჭირო. ეს არის ხანგრძლივი, ძალიან რთული ომი, რომელსაც დიდი დანაკარგები მოჰყვება. ამ მიზნების მიღწევა სამხედრო საშუალებებით შეიძლება, რაც დიდ დროს წაიღებს, თუმცა ამ მიზნების მიღწევა ასევე შესაძლებელია დიპლომატიური მეთოდებით“, - აღნიშნა მარკ მილიმ.