30 აგვისტო, 2022

„ენერგომომარაგების უსაფრთხოების თვალსაზრისით, ჩვენ ბევრად უკეთეს მდგომარეობაში ვართ, ვიდრე რამდენიმე თვის წინ ვიყავით, - აცხადებს გერმანიის კანცლერი ოლაფ შოლცი.

მისივე თქმით, გერმანია გეგმავს, ენერგიის დასაზოგად, 1-ლი სექტემბრიდან, არაერთი ღონისძიება გაატაროს, რათა ქვეყანა რუსული გაზის იმპორტის პოტენციური შეფერხებისთვის მოემზადოს.

„წინა წლისგან განსხვავებით, ჩვენი გაზის საწყობების 80%-ზე მეტით არის სავსე. გავაგრძელებთ მუშაობას დარჩენილი სივრცის შევსების მიზნით“, თქვა შოლცმა.

ენერგომომარაგების რუსეთზე დამოკიდებულების შემცირებას უსვამს ხაზს რობერტ ჰაბეკიც - გერმანიის ეკონომიკის მინისტრის განცხადებით, მიმდინარე წლის აგვისტოში, მოხმარებული ბუნებრივი აირის მხოლოდ 9,5% იყო რუსეთიდან, მაშინ, როდესაც გასულ წელს მოხმარებული აირის 55% რუსულ გაზზე მოდიოდა.