გია ცაგარეიშვილი - Factcheck-ი ამოწმებს იმას, რაც მას აინტერესებს და თვალს ხუჭავს იმ ფეიკნიუსების ნიაღვარზე, რომელიც მომდინარეობს პოლიტიკოსებისგან და პარტიული ტელევიზიებისგან
18 სექტემბერი, 2022
პოლიტიკოსთა და ექსპერტთა დიდი ნაწილი არასამთავრობო სექტორს ღიად ადანაშაულებს იმ კვლევების სუბიექტურობაში, რომელზეც წლების განმავლობაში მუშაობდნენ. ამ კონტექსტში საპარლამენტო უმრავლესობის წევრმა, გია ცაგარეიშვილმა Factcheck-ზე და Isfed-ზე „იმედის კვირასთან“ ისაუბრა.
„Factcheck-ი ამოწმებს იმას დადარაჯებულად, რაც მას აინტერესებს და თვალს ხუჭავს იმ ფეიკნიუსების ნიაღვარზე, რომელიც მომდინარეობს პოლიტიკოსებისგან და პარტიული ტელევიზიებისგან. გაბრალებენ შენ იმას, რაც არათუ ოდესმე გაგიკეთებია, არამედ არც გიფიქრია. მაგალითად, შეიძლება მინისტრს დააბრალონ, რომ ის იყო ვლადიკავკაზში და ამის ტირაჟირება მოახდინონ“, - ამბობს ცაგარეიშვილი.
მან ასევე ისაუბრა ორგანიზაცია „სამართლიან არჩევნებზე“ და მათ მიერ 2020 წელს გამოქვეყნებულ პარალელური დათვლის შედეგებზე.
„თქვეს, რომ ძალიან ბევრ უბანში ბალანსი ვერ ჯდება, რაც დაკავშირებული იყო გაყალბების ეჭვებთან. სწორედ ამ გაუგებარ და ყალბ ინფორმაციაზე დაყრდნობით, შემდეგ ჩვენმა ე.წ. რადიკალურმა ოპოზიციამ გადაწყვიტა პარლამენტის სხდომების ბოიკოტირება, პიკეტირება ამ შენობის და ლამის სამოქალაქო დაპირისპირებამდე მივიდა ყველაფერი. აქ მე ვფიქრობ, გააზრებული, შეგნებული როლი ითამაშა კონკრეტულად ამ არასამთავრობო ორგანიზაციამ“, - განაცხადა ცაგარეიშვილმა.
