გიორგი ჩაკვეტაძე უოტფორდში ითამაშებს! ტრანსფერი გადაწყვეტილია და ოფიციალურად უახლოეს საათებში დადასტურდება.

"ეკიპის" ჟურნალისტი საშა ტავოლიერი წერს, რომ ქართველი ფეხბურთელი უკვე ლონდონშია. "გენტსა" და "უოტფორდს" შორის შეთანხმება მიღწეულია, გიორგი ინგლისურ კლუბში იჯარით და გამოსყიდვის უფლებით გადავა.

მანამდე ჩაკვეს ფრანგულ "მეცში" გადასვლის შანსი ჰქონდა, მაგრამ ფრანგული კლუბის ტექნიკური შტაბის გაურკვევლობამ და დროის მოთხოვნამ ქართველ შემტევ ნახევარმცველს ინგლისური პროექტის არჩევა გადააწყვეტინა.

გიორგი ჩაკვეტაძემ კარიერა "დინამო თბილისში" დაიწყო, 2018 წელს კი ბელგიურ "გენტში" გადავიდა, სადაც თავიდან ყველაფერი კარგად მიდიოდა, მაგრამ შემდეგ ორჯერ მიიღო მძიმე ტრავმა, რის გამოც პრაქტიკულად 2 სეზონი გამოტოვა. "გენტში" 24 წლის ქართველმა 81 თამაშში თავი 8 გოლით და 19 საგოლე პასით გამოიჩინა. ბელგიელებმა ისე ჯერ "ჰამბურგში" გაანათხოვრეს, მერე ბრატისლავის "სლოვანში", სადაც გასულ სეზონში 47 მატჩში 1 გოლი გაიტანა, 9-ჯერ კი საგოლე პასი გააკეთა. საქართველოს ნაკრებში გიორგის 15 მატჩში 7 გოლი აქვს გატანილი.

"უოტფორდი" ჩემპიონშიპში თამაშობს, რომლის პირველ ტურში 5 აგისტოს, "ქპრ"-ს უმასპინძლებს. ინგლისურ კლუბში არაერთი ცნობილი ფეხბურთელი თამაშობს, მთავარი მწვრთნელი კი ბრემენის "ვერდერისა" და მიუნხენის "ბაიერნის" ყოფილი ფრანგი მცველი, ვალერიან ისმაელია.