ანკარასა და ევროკავშირს შორის ურთიერთობა არ უნდა გახდეს გარკვეული ქვეყნების ინტერესების მძევალი, თურქეთის გარეშე ევროკავშირი არ შეიძლება იყოს გლობალური მოთამაშე, - ამის შესახებ თურქეთის საგარეო საქმეთა მინისტრმა ჰაკან ფიდანმა სამეზობლო პოლიტიკისა და გაფართოების საკითხებში ევროკომისართან, ოლივერ ვარჰეისთან ერთად გამართულ პრესკონფერენციაზე ისაუბრა.

მისი თქმით, თურქეთი მოუწოდებს ევროკავშირს გამოიჩინოს საჭირო ნება და უფრო თამამად იმოქმედოს ანკარასა და ბრიუსელს შორის ურთიერთობების გასავითარებლად.

რაც შეეხება თურქეთის ევროკავშირში გაწევრიანების პერსპექტივებს, მან ხაზი გაუსვა, რომ ამ მიმართულებით რაიმე ცვლილებები არ შეინიშნება. დიპლომატმა აღნიშნა, რომ ანკარას აქვს ძლიერი პოლიტიკური ნება, რათა თურქეთის ევროკავშირში გაწევრიანების მიმართულებით იმოძრაოს.