ჰამასის დაჯგუფების ერთ-ერთმა წევრმა სალეჰ ალ-არურმა განაცხადა, რომ მებრძოლი ჯგუფი, რომელიც ღაზას მართავს, მზად არის "ყველა ვარიანტისთვის, მათ შორის ომისა და ესკალაციისთვის ყველა დონეზე". ინფორმაციას ამის შესახებ CNN ავრცელებს.

„ჩვენ მზად ვართ ყველაზე უარესი სცენარისთვის, მათ შორის სახმელეთო შემოჭრისთვის, რაც საუკეთესო იქნება ჩვენთვის ამ ბრძოლის დასასრულის გადასაწყვეტად“, - განუცხადა სალეჰ ალ-არურმა შაბათს "ალ ჯაზირას".

"მიმდინარეობს ინტენსიური საერთაშორისო და რეგიონალური ძალისხმევა კრიზისის დასასრულებლად, მაგრამ ახლა არაფერი იქნება უფრო მნიშვნელოვანი, ვიდრე ბრძოლა“, – დასძინა მან.

იმავდროულად, იზედინ ალ-ქასამის ბრიგადებმა, ჰამასის შეიარაღებულმა ფრთამ, შაბათს განაცხადეს, რომ ისინი კვლავ იბრძვიან 25 ლოკაციაზე. ჯგუფის განცხადებაში ასევე ნათქვამია, რომ მიმდინარეობს შეტაკებები რეიმის სამხედრო ბაზაზე ღაზის ჩრდილოეთ საზღვართან.