ჰავაის გუბერნატორის, ჯოშ გრინის განცხადებით, სამაშველო ბრიგადებმა ტყის ხანძრის შედეგად დამწვარი სახლებისა და ავტომობილების შემოწმება დაიწყეს.

მისივე თქმით, ხანძრისგან განადგურებულ ქალაქ ლაჰაინაში ჯერ მხოლოდ ტერიტორიის სამი პროცენტია გაწმენდილი, რაც აჩენს იმის ალბათობას, რომ მსხვერპლის მაჩვენებელი გაიზარდოს.

„ტყის ხანძრის შედეგად დაღუპულთა რიცხვი 96-მდე გაიზარდა, რაც ბოლო ასწლეულის მანძილზე ყველაზე მომაკვდინებელი მაჩვენებელია“, - განაცხადა გუბერნატორმა.

მისივე თქმით, ქალაქი ლაჰაინა თითქმის სრულიად განადგურებულია და დაღუპულთა სრული ოდენობის დადგენას მინიმუმ 10 დღე დასჭირდება.

ხანძრის შედეგად დაახლოებით 2 200 შენობა-ნაგებობა განადგურდა და ზარალი 6 მილიარდ დოლარს მიუახლოვდა. მედიის ინფორმაციით, კუნძულ მაუიზე ასობით ადამიანი დაკარგულად მიიჩნევა.

შეგახსენებთ, რომ ჰავაის კუნძულ მაუიზე ხანძარი 8 აგვისტოს გაჩნდა.