ლიბანური შიიტური დაჯგუფების, „ჰეზბოლას“ ლიდერი ჰასან ნასრალა ისრაელ-ღაზის ომზე დუმილს დაარღვევს და დღეს მხარდამჭერებს სიტყვით მიმართავს. ინფორმაციას „ბიბისი“ ავრცელებს.

ნასრალას გამოსვლა, სავარაუდოდ, ჯგუფის სამომავლო ნაბიჯებზე მიუთითებს, იმ დროს, როდესაც „ჰეზბოლას“ მებრძოლები და ისრაელის არმია ლიბან-ისრაელის საზღვარზე ინტენსიურ დაპირისპირებაში არიან ჩართულნი.

როგორც მედია წერს, „ჰეზბოლას“ ლიდერის მოსალოდნელმა განცხადებამ გააჩინა იმის შიში, რომ ტერიტორია შეიძლება კონფლიქტის კიდევ ერთი ფრონტი გახდეს. დაჯგუფებამ ისრაელზე თავდასხმები გააძლიერა. თავის მხრივ საპასუხო ნაბიჯებს დგამს ისრაელიც, მაგრამ, როგორც ჩანს, ორივე მხარემ საშიში ესკალაციის თავიდან ასაცილებლად გარკვეული ნაბიჯები გადადგა და დარტყმების უმეტესობა სასაზღვრო ზონით შემოიფარგლება.

„ჰამასმა“ თავის მოკავშირეებს არაერთხელ მოუწოდა, ბრძოლას შეუერთდნენ; ჩნდება კითხვები, უპასუხებს თუ არა „ჰეზბოლა“ ამ მოწოდებებს.

„ჰეზბოლა“, რომელსაც, „ჰამასის“ მსგავსად, დიდი ბრიტანეთი, აშშ და სხვები ტერორისტულ ორგანიზაციად მიიჩნევენ, ლიბანში ყველაზე დიდი პოლიტიკური და სამხედრო ძალაა. ისრაელის პრემიერ-მინისტრმა, ბენიამინ ნეთანიაჰუმ განაცხადა, რომ თუ „ჰეზბოლა“ მეორე ფრონტს გახსნის, ისრაელი „წარმოუდგენელი“ მასშტაბის პასუხს გასცემს.