იემენში აშშ-ისა და ბრიტანეთის სამხედრო ძალების მიერ განხორციელებული თავდასხმების შედეგად შიიტი „ჰუსიტების“ ხუთი მებრძოლი დაიღუპა, ექვსი კი დაშავდა. ამის შესახებ „ჰუსიტების“ პრესსპიკერმა, იაჰია სარეამ განაცხადა.

შიიტური დაჯგუფების წარმომადგენლის თქმით, გასული ღამის განმავლობაში აშშ-ისა და ბრიტანეთის სამხედროებმა იემენის ტერიტორია 73-ჯერ დაბომბეს. „ჰუსიტების“ პრესსპიკერის განცხადებით, თავდასხმები არ ჩაივლის „სასჯელის ან შურისძიების“ გარეშე და შიიტური დაჯგუფება ისრაელისკენ მიმავალ გემებზე თავდასხმებს გააგრძელებს.

„ღაზაში ისრაელის დანაშაულების მხარდაჭერის ფარგლებში, ამერიკელმა და ბრიტანელმა მტრებმა დაიწყეს სასტიკი აგრესია იემენის რესპუბლიკის წინააღმდეგ. დაიბომბა დედაქალაქი სანა და ჰოდეიდას, თაიზის, ჰაჯაჰისა და საადას რეგიონები. ამერიკელ და ბრიტანელ მტრებს ეკისრებათ სრული პასუხისმგებლობა ჩვენი იემენელი ხალხის წინააღმდეგ დანაშაულებრივ აგრესიაზე“, – განაცხადა „ჰუსიტების“ პრესსპიკერმა.