9 ივლისი, 2022

რეკონსტრუქციისა და განვითარების საერთაშორისო ბანკმა (IBRD), საერთაშორისო განვითარების ასოციაციამ და USAID-მა ერთი დონორის ნდობის ფონდი შექმნეს, რომლის მეშვეობითაც 1,7 მილიარდი დოლარის გრანტი უკრაინას გადაერიცხება,- ამის შესახებ უკრაინის პრემიერ-მინისტრმა დენის შმიგალმა განაცხადა.

მისი თქმით, შესაბამისი შეთანხმების პროექტი დღეს მთავრობის სხდომაზე დამტკიცდა.

„გრანტის მოზიდვა მოხდება უკრაინის სახელმწიფო ბიუჯეტში უსასყიდლოდ, უკან დაბრუნების გარეშე, USAID-ისგან IBRD-ისა და IDA-ს მხარდაჭერით“, - განაცხადა შმიგალმა.

მისივე თქმით, თანხები სახელმწიფო ბიუჯეტის ხარჯებს, სამედიცინო გარანტიების პროგრამით სამედიცინო მომსახურების გადახდას მოხმარდება.

"ეს არის ძალიან მნიშვნელოვანი მხარდაჭერა ჩვენი ამერიკელი პარტნიორებისგან", - შეაჯამა პრემიერმა.

მან ასევე განაცხადა, რომ წლის ბოლომდე უკრაინა მიიღებს კიდევ 20 მილიარდი დოლარის დახმარებას და მხარდაჭერას საერთაშორისო პარტნიორებისგან.