ჩვენ მხარს ვუჭერთ უკრაინის უფლებას, აირჩიოს საკუთარი გზა და გადაწყვიტოს, უსაფრთხოების რომელი არქიტექტურის ნაწილი იყოს, – ამის შესახებ ნატო-ს გენერალურმა მდივანმა, იენს სტოლტენბერგმა, ნატო-ში დაჩქარებული წესით გაწევრიანებაზე უკრაინის განაცხადის კომენტარისას აღნიშნა.

სტოლტენბერგის თქმით, ნებისმიერ დემოკრატიულ ქვეყანას აქვს უფლება, შეიტანოს განაცხადი, გადაწყვეტილება კი - 30 წევრი ქვეყნის კონსენსუსის შედეგად მიიღება.

„ევროპაში ნებისმიერ დემოკრატიულ ქვეყანას აქვს უფლება ნატო-ს წევრობაზე განაცხადი შეიტანოს და ნატო ამ უფლებას პატივს სცემს. ჩვენ არაერთხელ განვაცხადეთ, რომ ნატო-ს კარი ღია რჩება და ეს ვაჩვენეთ ბოლო რამდენიმე წლის განმავლობაში. მადრიდის სამიტზე ალიანსმა მკაფიოდ განაცხადა, რომ ჩვენ მხარს ვუჭერთ უკრაინის უფლებას, აირჩიოს საკუთარი გზა და გადაწყვიტოს, უსაფრთხოების რომელი არქიტექტურის ნაწილი იყოს. წევრობასთან დაკავშირებით გადაწყვეტილება, რა თქმა უნდა, მიიღება 30 წევრი ქვეყნის მიერ, კონსენსუსის საფუძველზე. ჩვენი ფოკუსი ახლა არის უკრაინისთვის მყისიერი დახმარება რუსეთის სასტიკი ინტერვენციისგან თავდასაცავად. ამჟამად, ეს არის ნატო-ს ალიანსის მთავარი ფოკუსი და ძალსიხმევა“, – განაცხადა სტოლტენბერგმა.

ცნობისთვის, უკრაინის პრეზიდენტმა ვოლოდიმირ ზელენკიმ, უკრაინის ნატო-ში დაჩქარებულად გაწევრიანებაზე განაცხადი შეტანის შესახებ დღეს განაცხადა.