"ჩვენ უკვე დავიწყეთ კონსულტაციები ჩვენს პარტნიორებთან TANAP-ის (ტრანს-ანატოლიური მილსადენი) წლიური მოცულობის 16 მილიარდი კუბური მეტრიდან 32 მილიარდ კუბურ მეტრამდე და TAP-ის (ტრანს-ადრიატიკული მილსადენი) - 10 მილიარდი კუბური მეტრიდან 20 მილიარდ კუბურ მეტრამდე გაფართოებაზე", - ამის შესახებ აზერბაიჯანის პრეზიდენტმა, ილჰამ ალიევმა, 1 ოქტომბერს, ბულგარეთის დედაქალაქ სოფიაში გამართულ ცერემონიაზე განაცხადა, რომელიც საბერძნეთ-ბულგარეთის გაზის ინტერკონექტორის გახსნას მიეძღვნა.

2020 წლის 31 დეკემბერს აზერბაიჯანმა ევროპაში გაზის კომერციული მიწოდება „ტრანს-ადრიატიკული მილსადენით“ დაიწყო, რომელიც „სამხრეთის გაზის დერეფნის“ ნაწილია.

„სამხრეთის გაზის დერეფანი“ მილსადენის ინტეგრირებულ სისტემას წარმოადგენს და ის ბაქოდან სამხრეთ იტალიამდე 3.5 ათას კმ-ზეა გადაჭიმული - საქართველოს, თურქეთის, საბერძნეთის და ალბანეთის გავლით. ნედლეულის ძირითადი წყაროა შაჰ-დენიზის საბადო, რომლის მარაგი 1.2 ტრილიონი კუბური მეტრია.