ილჰამ ალიევი ზოგიერთი საერთაშორისო ორგანიზაციის მუშაობის არაეფექტურობაზე საუბრობს
16 სექტემბერი, 2022
აზერბაიჯანის პრეზიდენტმა ილჰამ ალიევმა შანხაის თანამშრომლობის ორგანიზაციის 27-ე სამიტის გაფართოებულ შეხვედრაზე სიტყვით გამოსვლისას, ზოგიერთი საერთაშორისო ორგანიზაციის მუშაობის არაეფექტურობაზე ისაუბრა. მან ყურადღება გაამახვილა გაეროს უშიშროების საბჭოს ოთხ რეზოლუციაზე აზერბაიჯანის ტერიტორიებიდან სომხური შეიარაღებული ფორმირებების გაყვანის შესახებ, რომლებიც, ალიევის განცხადებით, არ განხორციელებულა 27 წლის განმავლობაში, ვიდრე თავად აზერბაიჯანმა არ მოაგვარა კონფლიქტი სამხედრო-პოლიტიკური საშუალებებით.
აზერბაიჯანის სახელმწიფოს მეთაურის თქმით, აზერბაიჯანსა და სომხეთს შორის სამშვიდობო შეთანხმების პროექტზე მუშაობა წინაპირობებისა და ხელოვნური შეფერხებების გარეშე უნდა მიმდინარეობდეს.
ალიევის განცხადებით, სომხეთის შეიარაღებული ძალების მიერ განხორციელებული ფართომასშტაბიანი პროვოკაციის შედეგად, აზერბაიჯან-სომხეთის სახელმწიფო საზღვარზე ვითარება გამწვავდა. მისი თქმით, ამან დიდი დარტყმა მიაყენა ორ ქვეყანას შორის სამშვიდობო პროცესს, რაზეც მთელ პასუხისმგებლობას სომხეთის სამხედრო-პოლიტიკურ ხელმძღვანელობას აკისრებს.
აზერბაიჯანის პრეზიდენტმა ასევე აღნიშნა აზერბაიჯანის დიდი წვლილი რეგიონული საკომუნიკაციო პროექტების განხორციელებაში, როგორიცაა „აღმოსავლეთი-დასავლეთი“ და „ჩრდილოეთი-სამხრეთი“.
მისი თქმით, მიმდინარე წლის შვიდი თვის განმავლობაში აზერბაიჯანის ტერიტორიაზე ტრანზიტი 50%-ით გაიზარდა.
