ინდოეთმა მზის შესასწავლად კოსმოსში რაკეტა Polar Satellite Launch Vehicle (PSLV) წარმატებით გაუშვა. ამის შესახებ BBC წერს.

გამოცემის ინფორმაციით, ეს ქვეყნის პირველი მისიაა ჩვენი სისტემის ვარსკვლავისკენ. PSLV-ზე განთავსებულია კოსმოსური ობსერვატორია Aditya-L1, რომელსაც სახელი ინდურ მითოლოგიაში მზის ღმერთის პატივსაცემად დაარქვეს.

ობსერვატორია 1,5 მილიონ კილომეტრს გაივლის - დედამიწიდან მზემდე არსებული დისტანციის 1%-ს და ლაგრანჟის წერტილში გაჩერდება - ეს არის ადგილი, სადაც ორი დიდი ობიექტის - მზისა და დედამიწის გრავიტაციული ძალები ერთმანეთს ანეიტრალებს. ამ წერტილამდე მისასვლელად რაკეტას 4 თვე დასჭირდება.

ამის შემდეგ Aditya-L1 მზის გარშემო მოძრაობას და ვარსკვლავზე დაკვირვებას დაიწყებს. მეცნიერების თქმით, მზის აქტივობის უკეთ შესწავლაში დაეხმარებათ.

ცოტა ხნის წინ ინდოეთმა წარმატებით დასვა მისია მთვარეზე. „ჩანდრაიანი 3“-ის მოდული „ვიქტრამი“ მთვარის ზედაპირზე 23 აგვისტოს დაჯდა. ეს პირველი აპარატია, რომელიც დედამიწის თანამგზავრის სამხრეთ პოლუსზე მუშაობს.