ვაკის პარკის შადრევანში ჩატარებული სამუშაოები და უსაფრთხოების ნორმები შემოწმებული იყო, განაცხადა „გრინ სერვის პლუსის“ დირექტორმა ლაშა ფურცხვანიძემ ჟურნალისტებთან საუბრისას.

საგამოძიებო მოქმედებები ვაკის პარკში მომხდარი უბედური შემთხვევის საქმეზე გრძელდება. ლაშა ფურცხვანიძე ვაკის პარკში მომხდარ ტრაგედიასთან დაკავშირებით უკვე მესამედ გამოიკითხა.

აღსანიშნავია, რომ ვაკე-საბურთალოს მთავარ სამმართველოში ამ წუთებში მოწმეებიც იკითხებიან. საგამოძიებო უწყებას უკვე გამოკითხული ჰყავს 100-ზე მეტი ადამიანი, თუმცა ამ ეტაპზე არავინ დაუკავებიათ.

ლაშა ფურცხვანიძემ ვაკე-საბურთალოს მთავარი სამმართველო ცოტა ხნის წინ დატოვა. მან ჟურნალისტებთან საუბრისას არ დააკონკრეტა თუ რა შეკითხვები ჰქონდათ საგამოძიებო უწყების სარმომადგენლებს.

„შემოწმებული იყო ელექტროობა დაინსტალირების დროსაც და მერეც. მე პასუხისმგებლობა ღმერთისგან უკვე მაქვს სიცოცხლის ბოლომდე, ამის შემდეგ რა პასუხისმგებლობა იქნება სიმართლე რომ გითხრათ, ამ ეტაპზე ნამდვილად არ მაინტერესებს. სავარაუდოდ, კიდევ დამიბარებენ“, - განაცხადა ლაშა ფურცხვანიძემ.

13 ოქტომბერს ვაკის პარკში თამაშისას ბავშვებს ბურთი შადრევანში ჩაუვარდათ, მისი ამოღების დროს, სამ არასრულწლოვანს დენმა დაარტყა. ორი მათგანი ხეჩინაშვილის, ერთი კი, იაშვილის კლინიკაში გადაიყვანეს. ერთ-ერთი არასრულწლოვანი კლინიკაში გარდაიცვალა.

გამოძიება სისხლის სამართლის კოდექსის 240-ე მუხლით მიმდინარეობს, რაც უსაფრთხოების წესების დარღვევას გულისხმობს და 4-დან 7 წლამდე პატიმრობას ითვალისწინებს.