ირანი მიუღებლად მიიჩნევს დასავლეთის კრიტიკას გამდიდრებული ურანის წარმოების დაჩქარებასთან დაკავშირებით
ოფიციალური თეირანი მიუღებლად მიიჩნევს დასავლეთის კრიტიკას გამდიდრებული ურანის წარმოების დაჩქარებასთან დაკავშირებით.
"ირანის გამდიდრების ცენტრებში 60%-ის დონეზე [ურანის] გამდიდრება ყოველთვის იყო და იქნება ქვეყნის მშვიდობიანი მოთხოვნილებების შესაბამისად და სრულად ატომური ენერგიის საერთაშორისო სააგენტოს ზედამხედველობის ქვეშ", - აღნიშნეს ირანის საგარეო უწყებაში.
აშშ-მა, საფრანგეთმა, დიდმა ბრიტანეთმა და გერმანიამ დაგმეს ირანის მიერ მაღალგამდიდრებული ურანის წარმოების დაჩქარება.
"ჩვენ ვგმობთ ამ ზომას, რომელიც კიდევ უფრო ამწვავებს ირანის ბირთვული პროგრამის მუდმივ ესკალაციას. ირანის მაღალგამდიდრებული ურანის წარმოებას არ აქვს სანდო სამოქალაქო გამართლება", - ნათქვამია ერთობლივ განცხადებაში.
მანამდე ატომური ენერგიის საერთაშორისო სააგენტოში განაცხადეს, რომ ირანმა კვლავ გაზარდა 60%-მდე გამდიდრებული ურანის წარმოება.
2015 წელს ირანი შეუერთდა ერთობლივ სამოქმედო გეგმას, რომელიც ითვალისწინებდა ირანის ეკონომიკური სანქციების ეტაპობრივ მოხსნას მისი ბირთვული პროგრამის შეწყვეტის სანაცვლოდ.