ირანის შინაგან საქმეთა მინისტრი აცხადებს, რომ აღმოსავლეთ აზერბაიჯანის პროვინციაში პრეზიდენტ იბრაჰიმ რაისის ვერტმფრენი „მძიმედ დაეშვა“
ირანის შინაგან საქმეთა მინისტრმა, აჰმად ვაჰიდმა დაადასტურა ინფორმაცია აღმოსავლეთ აზერბაიჯანის პროვინციაში პრეზიდენტ იბრაჰიმ რაისის ვერტმფრენის „მძიმედ დაშვების“ შესახებ.
ირანული მედიის ცნობით, ვერტმფრენის მგზავრებს შორის, ირანის პრეზიდენტთან ერთად, ქვეყნის საგარეო საქმეთა მინისტრი ჰოსეინ ამირაბდოლაჰიანიც იმყოფებოდა.
როგორც მთავრობამ მედიას განუცხადა, ირანის წითელი ჯვრის საზოგადოებას შემთხვევის ადგილზე მისვლა უამინდობის გამო გაუჭირდა. ასევე, ცნობილია, რომ პრეზიდენტის ვერტმფრენის გარდა, სხვა ვერტმფრენებმა, რომლებშიც მინისტრები და მაღალჩინოსნები ისხდნენ, დანიშნულების ადგილს უსაფრთხოდ მიაღწიეს.
შეგახსენებთ, რომ მედიაში გავრცელებული ინფორმაციით, ირანის პრეზიდენტის ვერტმფრენი, რომლითაც იბრაჰიმ რაისი აზერბაიჯანიდან თეირანში ბრუნდებოდა, აღმოსავლეთ აზერბაიჯანის პროვინციაში ჩამოვარდა. რაისი აზერბაიჯანში იმყოფებოდა, სადაც ილჰამ ალიევთან ერთად კაშხლის გახსნას დაესწრო, რის შემდეგაც უკან, ირანში ბრუნდებოდა.
