ისრაელის გენერალური შტაბის უფროსის, ჰერზი ჰალევის განცხადებით, ისრაელის ძალები ბრძოლის მომდევნო ეტაპზე გადადიან.

„ომის დაწყებიდან სამი კვირა გავიდა, ამ ომს ეტაპები აქვს და დღეს ჩვენ მომდევნო ეტაპზე გადავდივართ. ჩვენი ძალები ამჟამად ღაზის სექტორში ადგილზე მოქმედებენ. აქტივობები გამიზნულია იმისთვის, რომ შესრულდეს ომის ყველა მიზანი: „ჰამასის“ დაშლა, საზღვრების დაცვა და მძევლების სახლში დაბრუნება“, – განაცხადა ჰალევმა.

გენერალური შტაბის უფროსი ამბობს, რომ მტერს ასობით დაღუპული ჰყავს და მათი ინფრასტრუქტურა განადგურებულია.

„ღაზაში შექმნილი ვითარება „ჰამასის“ დანაშაულებრივი ქმედებების შედეგია, სწორედ აქ არის პასუხისმგებლობა. სახმელეთო ჯარები ამჟამად მნიშვნელოვან და კომპლექსურ ოპერაციას ახორციელებენ. არ არსებობს მიღწევები რისკის გარეშე და როგორც ვიცით, არცერთი გამარჯვება არ არსებობს საფასურის გარეშე“, – დასძინა ჰერზი ჰალევმა.