ირანმა ისრაელის მიმართულებით ათეულობით უპილოტო საფრენი აპარატი გაუშვა, – ინფორმაციას „თაიმს ოფ ისრაელი” ავრცელებს.

ისრაელის პრემიერ-მინისტრმა, ბენიამინ ნეთანიაჰუმ განაცხადა, რომ ისრაელი მზად არის ირანიდან პირდაპირი თავდასხმისთვის და ამ თავდასხმას უპასუხებს.

„ბოლო წლებისა და განსაკუთრებით, ბოლო კვირების განმავლობაში, ისრაელის მოქალაქეები, ისრაელი ემზადებოდა ირანიდან შესაძლო პირდაპირი თავდასხმისთვის. ჩვენი თავდაცვის სისტემები განლაგებულია და მზად ვართ ნებისმიერი სცენარისთვის, როგორც თავდაცვისთვის, ასევე შეტევისთვის. ისრაელის სახელმწიფო ძლიერია. ისრაელის თავდაცვის ძალები ძლიერია, ისრაელის საზოგადოება ძლიერია”, – განაცხადა ნეთანიაჰუმ.

თავის მხრივ, ისრაელის თავდაცვის ძალების სპიკერი დანიელ ჰაგარი ადასტურებს, რომ ირანიდან ათობით უპილოტო საფრენი აპარატია გაშვებული, რომლებიც ისრაელისკენ მიემართება.

ჰაგარიმ განაცხადა, რომ ისრაელის საჰაერო ძალები დრონებს თვალყურს ადევნებენ და აღნიშნა, რომ უპილოტო საფრენი აპარატების ისრაელამდე მისვლას რამდენიმე საათი დასჭირდება.

ისრაელის თავდაცვის ძალების სპიკერი თქმით, რაიმე დამატებითი დეტალის შესახებ თუ გახდება ცნობილი, ისრაელის თავდაცვის ძალები აცნობებენ მოსახლეობას.

შეგახსენებთ, რომ ირანის მხრიდან თავდასხმის საფრთხის ფონზე, დღეს ისრაელმა ყველა საგანმანათლებლო დაწესებულების საქმიანობა აკრძალა და სხვადასხვა სახის შეკრებებზე შეზღუდვები დააწესა.