26 სექტემბერი, 2022

იტალიაში ვადამდელ საპარლამენტო არჩევნებში პარტია Fratelli d'Italia („იტალიის ძმები“) იმარჯვებს, რომელსაც ჯორჯია მელონი ხელმძღვანელობს. წინასწარი შედეგებით, მან ხმების 26% მოიპოვა. ამის შესახებ La Repubblica იუწყება.

მატეო სალვინის პარტიამ "ლიგა" ხმების 8,9% მიიღო, ხოლო სილვიო ბერლუსკონის პარტიამ Forza Italia ("წინ, იტალია") - 8,3%. ეს სამი პოლიტიკური ძალა წარმოადგენს მემარჯვენე კოალიციას და ტელეარხ RAI-ს პროგნოზით, სწორედ ისინი მიიღებენ უმრავლესობას პარლამენტის ორივე პალატაში - 200 ადგილიდან 114-126 ფარგლებში მანდატს სენატში და 400 ადგილიდან სულ მცირე 232 მანდატს ქვედა პალატაში.

რაც შეეხება მემარცხენე პარტიების კოალიციას, მათ ჯამში 26,1% მოიპოვეს, ხოლო, პარტიამ "ხუთი ვარსკვლავის მოძრაობა", რომელიც დამოუკიდებლად იყრიდა კენჭს, ამომრჩეველთა 15,5%-ის მხარდაჭერა მიიღო.

ჯორჯია მელონის გამარჯვება სოციალურ ქსელში უკვე მიულოცეს უნგრეთის პრემიერ-მინისტრმა, ვიქტორ ორბანმა და უნგრეთის იუსტიციის მინისტრმა, იუდით ვარგამ.

"ბრავო, ჯორჯია, სრულიად დამსახურებული გამარჯვებაა. გილოცავ", - დაწერა ვიქტორ ორბანმა "Facebook"-ზე.

კოალიციის გამარჯვებას ასევე გამოეხმაურა ფრანგი პოლიტიკოსი, საფრანგეთის პარლამენტში პარტია "ნაციონალური გაერთიანების" ფრაქციის ლიდერი, მარინ ლე პენი.

"იტალიელმა ხალხმა გადაწყვიტა საკუთარი ბედი თვითონ განესაზღვრა. მათ ქვეყნის პარტიოტი და სუვერენული ხელისუფლება აირჩიეს. ვულოცავ ჯორჯია მელონისა და მატეო სალვინის ამ შესანიშნავ გამარჯვებას", - წერს ლე პენი "ტვიტერში".