იტალიაში საპარლამენტო არჩევნები მიმდინარეობს
25 სექტემბერი, 2022
იტალიაში ვადამდელი საპარლამენტო არჩევნები მიმდინარეობს. საყოველთაო არჩევნებისთვის საარჩევნო უბნები კვირას, ადგილობრივი დროით დილის 7:00 საათზე გაიხსნა.
25 სექტემბერს გამართულ ვადამდელ არჩევნებზე პარლამენტის ორი პალატის წევრების არჩევის შესაძლებლობა სამშობლოში მცხოვრებ 46 მილიონზე მეტ იტალიელ მოქალაქეს ექნება. მათ გარდა, კიდევ 5 მილიონ შესაძლო ამომრჩეველს ხმის მიცემა საზღვარგარეთ შეუძლია. ხმის მიცემის უფლება 18 წელს გადაცილებულ მოქალაქეებს აქვთ.
მედიის ცნობით საარჩევნო უბნებზე დილიდან რაიმე სახის აჟიოტაჟი არ შეინიშნება. Rainews24 -ის ინფორმაციის, დილის საათებში საარჩევნო უბნებზე აქტივობა მაღალი არ იყო.
იტალიის შინაგან საქმეთა სამინისტროს ცნობით, რომელიც ამავდროულად საარჩევნო კომისიის ფუნქციასაც ასრულებს, ქვეყანაში და მის ფარგლებს გარეთ ჯამში 61 ათას საარჩევნო უბანზე მეტია გახსნილი. ისინი მუშაობას 23:00 საათამდე გააგრძელებენ. ხმების დათვლა კი მათი დახურვისთანავე დაიწყება. ეგზიტპოლის პირველი შედეგების გამოცხადება საღამოს 23:00 საათის შემდეგაა მოსალოდნელი, პირველი ოფიციალური შედეგები კი, ორშაბათ დილისკენ გამოცხადდება.
შეგახსენებთ, რომ მედიის ინფორმაციით, უახლესი გამოკითხვების თანახმად, იტალიას სავარაუდოდ მემარჯვენე კოალიცია უხელმძღვანელებს, რადგან, მათი ვარაუდით, პარტია „იტალიის ძმები“, რომელსაც ჯორჯია მელონი ხელმძღვანელობს, ხმათა უმეტესობას მოპოვებს. არჩევის შემთხვევაში, მელონი იტალიის პირველი ქალი პრემიერ-მინისტრი იქნება.