18 აგვისტო, 2022

2022 წლის ივლისში წინა წლის ანალოგიურ პერიოდთან შედარებით თბილისში ბინის ქირის ფასი 69,8%-ით გაიზარდა - ამის შესახებ „თიბისი კაპიტალის“ ანგარიშშია აღნიშნული.

ამავე კვლევის მიხედვით, ივლისში თბილისის უძრავ ქონებასთან დაკავშირებული ტრანზაქციები (ყიდვა/გაყიდვა) წინა თვესთან შედარებით 0.3%-ით შემცირდა, ხოლო წინა წლის ანალოგიურ პერიოდთან შედარებით კი 17.2%-ით გაიზარდა.

ამავე ანგარიშის მიხედვით, მოთხოვნა გაუმჯობესდა ახალ ბინებზე. ივლისში 800 ახალი ბინა გაიყიდა, რაც 53.6%-ით მეტია წინა წლის იმავე პერიოდზე. ძველ აშენებულ ბინებზე 10%-იანი ზრდა დაფიქსირდა.

ყველაზე მეტად ტრანზაქციების რაოდენობა თბილისის შემდეგ 3 რაიონში გაიზარდა:

• ჩუღურეთი +82%;
• დიდი დიღომი +49%;
• კრწანისი +36%.

აღსანიშნავია, რომ დიდუბე ერთადერთი რაიონია თბილისში, სადაც, კვლევის მიხედვით, 2022 წლის ივლისში ტრანზაქციების 11%-იანი კლება დაფიქსირდა.

ამასთან, 2022 წლის ივლისში თბილისში ერთი კვადრატული მეტრი ბინის ფასი საშუალოდ 921 დოლარს შეადგენს, ხოლო ერთი კვადრატული მეტრი გასაქირავებელი ფართის ფასი კი 8,3 დოლარია.