ჯანდაცვის სამინისტროში აცხადებენ, რომ მიხეილ სააკაშვილის მოსანახულებლად ორ სამედიცინო ექსპერტზე თანხმობა გაცემულია
26 აგვისტო, 2022
ყოფილი პრეზიდენტის, მიხეილ სააკაშვილის მოსანახულებლად ორ სამედიცინო ექსპერტზე ჯანდაცვის სამინისტროს თანხმობა გაცემული აქვს,- ამის შესახებ „ინტერპრესნიუსს“ ჯანდაცვის სამინისტროში განუცხადეს.
რაც შეეხება დანარჩენი ექსპერტების დაშვებას, როგორც უწყებაში განმარტავენ, სათანადო საბუთების წარდგენის შემთხვევაში კომისია დადგენილ ვადებში იმსჯელებს და შესაბამის რეაგირებას მოახდენს.
შეგახსენებთ, რომ ადვოკატ შალვა ხაჭაპურიძის განცხადებით, დაუშვებენ თუ არა მესამე პრეზიდენტ მიხეილ სააკაშვილთან ორ უცხოელ ექსპერტს ამის თაობაზე პასუხი ჯანდაცვის სამინისტროსგან ჯერჯერობით ცნობილი არ არის.
როგორც „ინტერპრესნიუსს“ ადვოკატმა განუცხადა, თანხმობის შემთხვევაში, ამერიკელი და შვეიცარიელი ექსპერტები მზად არიან ხვალვე ჩამოვიდნენ საქართველოში და კლინიკა „ვივამედში“ შევიდნენ, სადაც მესამე პრეზიდენტი რამდენიმე თვეა მკურნალობს.
შალვა ხაჭაპურიძის თქმით, ყოფილ პრეზიდენტთან სამედიცინო თვალსაზრისით მუშაობის მზაობა გამოთქვა კიდევ სამმა უცხოელმა ექსპერტმა. როგორც ხაჭაპურიძე განმარტავს, სააკაშვილთან ექსპერტების დაშვებასთან დაკავშირებით პასუხს ჯანდაცვის სამინისტროსგან ამ დრომდე ელოდებიან.
