ჯასტინ ტრიუდოს განცხადებით, მაჰსა ამინის სიკვდილზე პასუხისმგებელ პირებს კანადა სანქციებს დაუწესებს
27 სექტემბერი, 2022
22 წლის მაჰსა ამინის სიკვდილზე პასუხისმგებელ პირებს კანადა სანქციებს დაუწესებს. სანქციები მათ შორის "ირანის ზნეობის პოლიციასა" და მის ხელმძღვანელობასაც შეეხება. ამის შესახებ კანადის პრემიერ-მინისტრმა, ჯასტინ ტრიუდომ განაცხადა.
„ჩვენ კვლავ ვხედავთ, რომ ირანი ადამიანის უფლებებს უგულებელყოფს, ამას ახლა მაჰსა ამინის გარდაცვალებითა და პროტესტების ჩახშობით ვხედავთ. დღეს ვაცხადებ, რომ ჩვენ სანქციებს ათობით ფიზიკურ პირსა და კომპანიას დავუწესებთ, მათ შორის იქნება ირანის ე.წ. ზნეობის პოლიცია“, – განაცხადა ტრიუდომ.
მანამდე, მაჰსა ამინის გარდაცვალებასთან დაკავშირებით სანქციების დაწესების შესახებ, კანადის საგარეო საქმეთა მინისტრმა, მელანი ჯოლიმ გაერო-ს გენერალურ ასამბლეაზე სიტყვით გამოსვლისას გამოაცხადა.
ახალგაზრდა ქალი მაჰსა ამინი თეირანში ჰიჯაბის ტარების წესის დარღვევისთვის დააკავეს. ის 16 სექტემბერს საავადმყოფოში გარდაიცვალა. თვითმხილველები აცხადებენ, რომ ქალი ნაცემი იყო. ამინის მკვლელობას ირანსა და მსოფლიოს სხვა ქვეყნებში საპროტესტო გამოსვლები მოჰყვა.
