21 სექტემბერი, 2022

ჩვენ არ ვთხოვთ რომელიმე ქვეყანას, აირჩიოს აშშ-სა ან რომელიმე სხვა პარტნიორს შორის, თუმცა აშშ შეუჩერებელი იქნება თავისუფალი, ღია, უსაფრთხო და აყვავებული მსოფლიოს შესახებ ჩვენი ხედვის მხარდაჭერაში, – ამის შესახებ აშშ-ის პრეზიდენტმა, ჯო ბაიდენმა გაერო-ს გენერალური ასამბლეის 77-ე სესიაზე სიტყვით გამოსვლისას განაცხადა.

„ნება მიბოძეთ, პირდაპირ ვისაუბრო აშშ-სა და ჩინეთს შორის კონკურენციაზე. გეოპოლიტკური ტენდენციების მართვასთან ერთად, აშშ იმოქმედებს როგორც გონივრული ლიდერი. ჩვენ არ ვეძებთ კონფლიქტებს, ჩვენ არ მივისწრაფვით ცივი ომისკენ, ჩვენ არ ვთხოვთ რომელიმე ქვეყანას, აირჩიოს აშშ-სა ან რომელიმე სხვა პარტნიორს შორის. თუმცა აშშ შეუჩერებელი იქნება თავისუფალი, ღია, უსაფრთხო და აყვავებული მსოფლიოს შესახებ ჩვენი ხედვის მხარდაჭერაში. ის, რაც შეგვიძლია შევთავაზოთ ერებსა და საზოგადოებას – ინვესტიციებია, რომლებიც მიმართულია არა დამოკიდებულების გაძლიერებისკენ, არამედ ქვეყნების დახმარებისკენ, რომ გახდნენ თვითკმარი. პარტნიორობა არა პოლიტიკურ ვალდებულებების შესაქმნელად, არამედ იმიტომ, რომ ჩვენ ვიცით, რომ საკუთარი წარმატების ზრდა სხვა ქვეყნების წარმატებაცაა. როდესაც ადამიანს აქვს შანსი იცხოვროს ღირსეულად, განავითაროს თავისი ტალანტი, ეს ყველასთვის სარგებლის მომტანია. უკიდურესად მნიშვნელოვანია ამ ინსტიტუტის უმაღლესი მიზნების შესრულება, რაც არის ყველასთვის და ყველგან მშვიდობისა და უსაფრთხოების გაძლიერება“,- განაცხადა აშშ-ის პრეზიდენტმა.

სიტყვით გამოსვლისას ბაიდენმა ასევე თქვა, რომ აშშ მიისწრაფის ტაივანის სრუტეში მშვიდობისა და სტაბილურობისკენ. მისივე თქმით, ვაშინგტონი ეწინააღმდეგება რომელიმე მხარის მიერ სტატუს-კვოს ცვლილებას.

აშშ-ის ლიდერმა ირანზე ისაუბრა და აღნიშნა, რომ აშშ არ დაუშვებს, რომ ირანმა ბირთვული იარაღი მოიპოვოს. ბაიდენმა ასევე ამერიკელების სახელით მხარდაჭერა გამოუცხადა „მამაც ირანელ ქალებს, რომლებიც ამჟამად დემონსტრაციებს მართავენ თავიანთი ფუნდამენტური უფლებების უზრუნველსაყოფად“.

მან ასევე მოუწოდა მსოფლიო ლიდერებს, დაადასტურონ ბირთვული იარაღის გაუვრცელებლობის რეჟიმისადმი ერთგულება დიპლომატიური გზით.

„არ აქვს მნიშვნელობა, თუ რა ხდება მსოფლიოში, აშშ მზად არის მისდიოს შეიარაღების კონტროლის კრიტიკულ ზომებს. ბირთვულ ომში გამარჯვება შეუძლებელია და ის არასდროს უნდა მოხდეს. უშიშროების საბჭოს ხუთმა მუდმივმა წევრმა ეს ახლახანს დაადასტურა იანვარში, თუმცა დღეს ჩვენ საგანგაშო ტენდენციებს ვხედავთ“, – განაცხადა ბაიდენმა.

მისი თქმით, ბირთვული იარაღის გაუვრცელებლობის რეჟიმი გაერო-ს ერთ-ერთი უდიდესი მიღწევაა და მსოფლიომ არ უნდა დაუშვას, რომ ამ მიმართულებით უკუსვლა მოხდეს.

ამასთან, ბაიდენის თქმით, მსოფლიოს ქვეყნებს ერთიანობისკენ მოუწოდა.

„მოდით, დავდგეთ ერთად, რათა გამოვაცხადოთ მზადყოფნა, რომ მსოფლიოს ქვეყნები კვლავ ერთიანი არიან, რომ ჩვენ ვდგავართ გაერო-ს ქარტიის პრინციპების მხარდასაჭერად, რომ კვლავ გვჯერა, ერთად მუშაობით ჩვენ შეგვიძლია ისტორია მივმართოთ უფრო თავისუფალი და სამართლიანი მსოფლიოსკენ ჩვენი შვილებისთვის იმის მიუხედავად, რომ ვერც ერთმა ჩვენგანმა ვერ მიაღწია ამას სრულად. ჩვენ არ ვართ პასიური თვითმხილველები, ჩვენ ვართ ისტორიის ავტორები. ჩვენ შეგვიძლია ამის გაკეთება, ჩვენ უნდა გავაკეთოთ ეს ჩვენთვის და კაცობრიობის მომავლისთვის“, – განაცხადა ბაიდენმა.

ავტორი - ქეთი ჩოხელი