აშშ-ის პრეზიდენტი ჯო ბაიდენი აცხადებს, რომ ისრაელსა და „ჰამასს“ შორის ომი უნდა დაპაუზდეს, რათა მძევლების გათავისუფლება მოხდეს. ამის შესახებ ბაიდენმა მინესოტაში განაცხადა. მან ღონისძიებაზე აუდიტორიაში მყოფ ერთ-ერთ ქალბატონს უპასუხა, რომელმაც აშშ-ის პრეზიდენტს მიმართა, ისრაელსა და „ჰამასს“ ცეცხლის შეწყვეტისკენ მოუწოდოს.

„ვფიქრობ, ჩვენ გვჭირდება პაუზა. პაუზა ნიშნავს, რომ დრო დავუთმოთ მძევლების გამოყვანას“, – აღნიშნა ბაიდენმა.

მოგვიანებით თეთრმა სახლმა განმარტა, რომ პრეზიდენტი ჰუმანიტარულ დახმარებას და იმ 240 მძევალის გათავისუფლებას გულისხმობდა, რომლებიც „ჰამასის“ ტყვეობაში არიან.

ბაიდენმა ასევე აღნიშნა, რომ სიტუაცია როგორც ისრაელელებისთვის, ასევე მუსლიმური სამყაროსთვის „წარმოუდგენლად რთულია“.

„მე მხარი დავუჭირე გამოსავლის მოძებნას ორი სახელმწიფოს პრინციპებზე დაყრდნობით. საქმე ის არის, რომ „ჰამასი“ ტერორისტული ორგანიზაციაა“, – აღნიშნა აშშ-ის პრეზიდენტმა.