შეერთებული შტატები მკაცრად გმობს რუსეთის მიერ უკრაინაში, მათ შორის კიევში დღეს განხორციელებულ სარაკეტო დარტყმებს. ამ დარტყმების შედეგად დაიღუპნენ და დაშავდნენ სამოქალაქო პირები, ხოლო განადგურებულ სამიზნეებს სამხედრო დანიშნულება არ ჰქონდათ. ეს დარტყმები კიდევ ერთხელ გვაჩვენებს პრეზიდენტ პუტინის უკანონო ომის სრულ სისასტიკეს უკრაინელი ხალხის მიმართ, - ამის შესახებ აშშ-ის პრეზიდენტის, ჯო ბაიდენის განცხადებაშია ნათქვამი, რომელსაც თეთრი სახლი ავრცელებს.

"ვუსამძიმრებთ დაღუპულთა ოჯახებს და ახლობლებს, ხოლო დაშავებულებს გამოჯანმრთელებას ვუსურვებთ.

ეს თავდასხმები კიდევ უფრო აძლიერებს ჩვენს ვალდებულებას, ვიყოთ უკრაინელი ხალხის გვერდით, რამდენი ხანიც საჭირო იქნება. ჩვენს მოკავშირეებთან და პარტნიორებთან ერთად, გავაგრძელებთ რუსეთისთვის სანქციების დაწესებას მათ მიერ გამოვლენილი აგრესიის გამო, ხოლო, პუტინი და რუსეთი პასუხისმგებელნი იქნებიან ომის საშინელებებისა და დანაშაულებებისთვის. ჩვენ გავაგრძელებთ ყველა საჭირო დახმარებას უკრაინის მიმართ, იმისათვის, რომ მათ დაიცვან თავიანთი ქვეყანა და თავისუფლება.

ჩვენ კიდევ ერთხელ მოვუწოდებთ რუსეთს დაუყოვნებლივ შეწყვიტოს ეს არაპროვოცირებული აგრესია და გაიყვანოს თავისი ჯარები უკრაინიდან", - ნათქვამია აშშ-ის პრეზიდენტის განცხადებაში.