აშშ-ის პრეზიდენტმა, ჯო ბაიდენმა, ისრაელსა და ღაზაში განვითარებულ მოვლენებთან დაკავშირებით, რომის პაპ ფრანცისკესა და ისრაელის პრემიერ-მინისტრ, ბენიამინ ნეთანიაჰუსთან სატელეფონო საუბარი გამართა.

თეთრი სახლის ინფორმაციით, რომის პაპთან დისკუსიისას ბაიდენმა „ჰამასის“ თავდასხმა დაგმო და ღაზაში ჰუმანიტარული დახმარების მიწოდების შესახებ ისაუბრა.

„მხარეებმა რეგიონში ესკალაციის თავიდან აცილების აუცილებლობა და ახლო აღმოსავლეთში გრძელვადიანი მშვიდობისთვის მუშაობის საკითხები განიხილეს“, – აღნიშნულია თეთრი სახლის მიერ გავრცელებულ ინფორმაციაში.

ბენიამინ ნეთანიაჰუსთან საუბრისას ბაიდენმა "ჰამასის“ მიერ დაკავებული ყველა დარჩენილი მძევლის გათავისუფლების უზრუნველსაყოფად აუცილებელ ზომებს გაუსვა ხაზი.

„აშშ-ის პრეზიდენტი და ისრაელის პრემიერი შეთანხმდნენ, რომ მჭიდრო კონტაქტს შეინარჩუნებენ“, – აღნიშნულია თეთრი სახლის ინფორმაციაში.