მილიარდერ ჯორჯ სოროსის მიერ დაარსებული ორგანიზაცია Open Society Foundations გეგმავს თავისი საქმიანობის დიდი ნაწილი შეწყვიტოს ან გაიტანოს ევროკავშირის ქვეყნებიდან, ვინაიდან ყურადღება მსოფლიოს სხვა ქვეყნებზე გადააქვს. ამის შესახებ სააგენტო "Reuters" შიდა ელექტრონულ წერილებზე დაყრდნობით იუწყება.

თანამშრომლებისთვის გაგზავნილ წერილებში აღნიშნულია, რომ მიღებული გადაწყვეტილების თანახმად, ფონდი ევროპის შიდა სამუშაო საქმეებიდან ყურადღებას უფრო გლობალურ და რეგიონალურ საკითხებზე გადაიტანს.

"ახალი დამტკიცებული სტრატეგიული მიმართულება ითვალისწინებს ევროკავშირის ფარგლებში ჩვენი მიმდინარე სამუშაოების დიდი ნაწილის უკან გაწვევას და შეწყვეტას, და ჩვენი ფოკუსის გადატანას და რესურსების განაწილებას მსოფლიოს სხვა ნაწილებზე", - ნათქვამია ელექტრონულ წერილებში.

"აღნიშნული ცვლილება განპირობებულია არა წლების მანძილზე თანამშრომლების მიერ გაწეული სამუშაო პროცესით ან მათი წვლილით ამ საქმიანობაში, არამედ ეს არის მომავალზე ორიენტირებული გადაწყვეტილება, რომელიც მომავალში მნიშვნელოვანი გავლენების მოხდენის შესაძლებლობას მოგვცემს".

შიდა მიმოწერაში არ არის აღნიშნული, თუ როგორ განაწილდება სამომავლოდ ფონდის დაფინანსება, თუმცა, როგორც წარმომადგენელმა აღნიშნა, ფონდი გააგრძელებს ევროპის ქვეყნებში სამოქალაქო საზოგადოების ჯგუფების მხარდაჭერას, მათ შორის ევროკავშირის საგარეო საკითხების მიმართულებით.