27 აგვისტო, 2022

ევროპული არმიები შეიძლება, აღწერილი იყოს, როგორც „ბონსაი არმიები“; ისინი გამოიყურებიან, როგორც ნამდვილი, მაგრამ დაყვანილი არიან მინიატურულ ვერსიებამდე, – ამის შესახებ საგარეო და უსაფრთხოების საკითხებში ევროკავშირის უმაღლესმა წარმომადგენელმა, ჯოზეფ ბორელმა საკუთარ ბლოგზე დაწერა.

ჯოზეფ ბორელი მიიჩნევს, რომ ევროპელებმა ერთობლივად უნდა განიხილონ თავიანთი შესაძლებლობები ინტენსიური ომის შემთხვევაში და ითანამშრომლონ თავიანთი თავდაცვის შესაძლებლობების გასაუმჯობესებლად ახალი სტრატეგიული გამოწვევების წინაშე.

ბორელი აღნიშნავს, რომ ბოლო 20 წლის განმავლობაში ევროპული არმიების მთავარი მიზანი იყო ე.წ. ექსპედიციური ოპერაციები, მაგალითად ავღანეთში, ერაყსა და საჰელში. მისი თქმით, ამ დროის განმავლობაში, მთელ ევროპაში განხორციელდა თავდაცვის ბიუჯეტის მკვეთრი და არაკოორდინირებული შემცირება, მაშინ, როცა აშშ-მა, ჩინეთმა, რუსეთმა და სხვა სახელმწიფოებმა მნიშვნელოვნად გაზარდეს თავიანთი ბიუჯეტი.

„ასე რომ, შედარებითი უფსკრული ევროპის ქვეყნებსა და სხვა ქვეყნებს შორის მკვეთრად გაიზარდა. როგორც მე არაერთხელ ვამბობდი, ეს არის ის, რაც ჩვენ სასწრაფოდ უნდა გადავწყვიტოთ“, – აცხადებს ბორელი.

ბორელის თქმით, ევროპული შეიარაღებული ძალები ერთგვარ „ბონსაი არმიად“ გადაიქცა.

„ევროპული არმიები გამოცარიელებულ იქნა და აღწერილ იქნა, როგორც „ბონსაი არმიები“: ისინი ნამდვილს ჰგვანან, მაგრამ მინიატურულ ვერსიებამდე არიან დაყვანილნი“, – წერს ბორელი.

ბორელი აღნიშნავს, რომ „ბონსაი არმიებით“ შეუძლებელია წინააღმდეგობის გაწევა უფრო საფრთხის შემცველი სტრატეგიული ლანდშაფტის პირობებში, სადაც მოწინააღმდეგეები მაღალი ინტენსივობის ომს იყენებენ და ამავდროულად, ევროპა არ შეიძლება, კმაყოფილი იყოს ექსპედიციური ომის გამოცდილებით.

„ეს ყველაფერი მოითხოვს, რომ ღრმად და სერიოზულად ვიფიქროთ ჩვენ წინაშე არსებულ არჩევანზე და კომპრომისებზე და მივიღოთ შესაბამის გადაწყვეტილებები. მთავარია, ამაზე ვიფიქროთ ერთად, როგორც ევროპელებმა. ჩვენს ჯარებს უნდა ჰქონდეთ, როგორც ტერიტორიული დაცვის, ასევე დისტანციაზე ასიმეტრიული ომის წარმოების შესაძლებლობა“, – აღნიშნავს ბორელი.

ევროკავშირის უმაღლესი წარმომადგენლის თქმით, ეს ნატო-ს ფარგლებში უნდა მოხდეს, ვინაიდან ევროკავშირის წევრი თითქმის ყველა ქვეყანა ახლა ალიანსის წევრია.

„მაგრამ, ჩვენ ასევე უნდა შეგვეძლოს, უფრო მეტად დავეყრდნოთ საკუთარ თავს და გამოვავლინოთ ჩვენი სტრატეგიული პასუხისმგებლობა, როდესაც ჩვენი უსაფრთხოების ინტერესები საფრთხეშია ჩვენს საზღვრებთან და მის ფარგლებს გარეთ. ამიტომ ევროკავშირის წევრმა ქვეყნებმა უკეთესი ინვესტიცია უნდა განახორციელონ ერთად და ითანამშრომლონ თავდაცვის სფეროში“, – განაცხადა ბორელმა.