მეტროსადგურ „გოცირიძის“ სარეაბილიტაციო სამუშაოები ფაქტობრივად დასრულებულია, განაცხადა თბილისის მერმა კახა კალაძემ მუნიციპალიტეტის მთავრობის დღევანდელ სხდომაზე საუბრისას.

როგორც კალაძემ აღნიშნა, კომპანიის უპასუხისმგებლობა, სარეაბილიტაციო პროცესის დაგვიანებასთან დაკავშირებით, კატეგორიულად მიუღებელია.

„ამ ეტაპზე მიმდინარეობს შშმ პირთათვის განკუთვნილი ლიფტის მონტაჟი და ექსპლუატაციაში მიღების პროცედურები. დაახლოებით 210 დღე იყო განკუთვნილი, რომ სამუშაოები დასრულებულიყო, ამ პროცესმა ძალიან ბევრი პრობლემები შექმნა. კარგად მესმის, რომ ბაქნის მთლიანი ცვლილება გახდა საჭირო. ეს პროექტში არ იყო გათვალისწინებული, ავარიულობიდან გამომდინარე მოხდა ამ სამუშაოს ჩატარება, თუმცა დაგვიანება კატეგორიულად მიუღებელია. ძალიან გულდასაწყვეტია, რომ არსებობენ ასეთი უპასუხისმგებლო კომპანიები, რომლებიც ჯეროვნად ვერ ასრულებენ შესაბამის სამუშაოებს. ეს ყველაფერი კი, აისახება ჩემზე, თანაგუნდელებზე, ვინც 24-საათიან რეჟიმში მუშაობენ, რათა ქალაქი უკეთესობისკენ შეიცვალოს", - განაცხადა კალაძემ.

თბილისის მერის თქმით, მერიის მხრიდან ამ ყველაფერს შესაბამისი რეაგირება აუცილებლად მოჰყვება. აღნიშნულ სამუშაოებს ტენდერში გამარჯვებული კომპანია შპს „მამისონი“ ასრულებდა.