საქართველოს საკალათბურთო ნაკრების კაპიტანი თორნიკე შენგელია ორთვიანი პაუზის შემდეგ მოედანს უბრუნდება. იტალიური მედიის ცნობით, "ვირტუსის" ფორვარდი დიდი ალბათობით, მადრიდის "რეალთან" შეხვედრაში დაბრუნდება.

"ვირტუს ბოლონია" ევროლიგის მე-5 ტურის შეხვედრას 27 ოქტომბერს, სტუმრად მადრიდის "რეალთან" ჩაატარებს. სერჯო სკარიოლოს გუნდს ჩატარებულ 4 თამაშში 1 მოგება აქვს და ცხრილში მე-15 პოზიციას იკავებს, ევროლიგის ვიცე-ჩემპიონი "რეალი" კი 2 მოგებითა და 2 წაგებით მე-9 ადგილზეა.

აღსანიშნავია, რომ თორნიკე შენგელიამ მხრის ტრავმა 24 აგვისტოს, მსოფლიოს ჩემპიონატის შესარჩევ მატჩში მიიღო ნიდერლანდების წინააღმდეგ და ამის გამო ევრობასკეტიც გამოტოვა, საქართველოს ნაკრებმა კი 1-4 ბალანსით ჯგუფიდან გასვლა ვერ მოახერხა.

31 წლის თორნიკე შენგელია "ვირტუს ბოლონიას" გაზაფხულზე, შეუერთდა და გუნდთან ერთად საკალათბურთო ევროთასის გამარჯვებული გახდა, იტალიურ ლიგაში კი ვიცე-ჩემპიონობას დასჯერდა. ტრავმის მიუხედავად, "ვირტუს ბოლონიამ" ქართველ კალათბურთელს ახალი სეზონის წინ კონტრაქტი გაუფორმა.