ქარიშხალი „ჰილარი“ მექსიკის ქვემო კალიფორნიის ნახევარკუნძულს დაატყდა თავს. აშშ-ის ხელისუფლება მოსახლეობას კალიფორნიის შტატში მოსალოდნელი კატასტროფული წყალდიდობის შესახებ აფრთხილებს.

ნახევარკუნძულის ჩრდილოეთით გადაადგილებისას შტორმის სიმძლავრე მეოთხიდან მესამე კატეგორიამდე შესუსტდა, თუმცა მასშტაბური წყალდიდობის საფრთხე კვლავ შენარჩუნებულია.

„მიმდინარე შაბათ-კვირას და მომავალი კვირის დასაწყისში ქვემო კალიფორნიის ნახევარკუნძულისა და სამხრეთ კალიფორნიის ძირითად ნაწილში სიცოცხლისთვის საშიში და პოტენციურად კატასტროფული წყალდიდობაა მოსალოდნელი“, – ნათქვამია აშშ-ის ქარიშხლების ეროვნული ცენტრის განცხადებაში.

წყალდიდობის რისკია სან-დიეგოდან ლოს-ანჯელესამდე და ლას-ვეგასამდე. ნახევარკუნძულზე მდებარე მექსიკის დასახლებებში კი გაუქმდა საჯარო ღონისძიებები, ორშაბათს დახურული იქნება სკოლები. მექსიკის სიდიდით მეორე ქალაქ ტიხუანაში მაღალი რისკის ზონაში მცხოვრებ მოსახლეობას უსაფრთხო რაიონებში გადასვლისკენ მოუწოდებენ.