საქართველოს ძიუდოისტთა ნაკრების წევრებმა ლაშა ბექაურმა და ლუკა მაისურაძემ, რომლებიც 90 კილოგრამ წონით კატეგორიაში ასპარეზობდნენ, უზბეკეთის დედაქალაქ ტაშკენტში მიმდინარე მსოფლიოს ჩემპიონატზე ბრინჯაოს მედლები მოიპოვეს.

22 წლის ბექაურმა ბრინჯაოს მედლისთვის ორთაბრძოლაში ესპანეთის სახელით მოასპარეზე ტრისტან მოსახლიშვილს აჯობა. თავდაპირველად, ბექაურმა მეტოქეს ვაზარი აუღო, მალევე კი ლაპარაზი სუფთა გდება შეასრულა და იპონიც მიითვალა. აღსანიშნავია, რომ ბექაურისთვის ეს მსოფლიოს ჩემპიონატებზე აღებული პირველი მედალია.

მოქმედმა ოლიმპიურმა ჩემპიონმა მანამდე გზიდან იაპონელი კოსუკე მაშიამა, ბრაზილიელი რაფაელ მასედო და კუბელი ივან ფელიპე სილვა მორალესი ჩამოიცილა, ნახევარფინალში კი უზბეკ დავლატ ბობონოვთან ილეთზე თავით წასვლის გამო მოხსნეს.

მაისურაძემ ბრინჯაოს მედლის მოპოვება ხსენებულ სილვა მორალესთან დაპირისპირებაში შეძლო, რომელიც დამატებით დროში ვაზარიზე დააგდო. ცნობისთვის, ეს მსოფლიოს ჩემპიონატებზე ლუკას მეორე მედალია. 2019 წელს ტოკიოში გამართულ ტურნირზე მან ასევე ბრინჯაო დაისაკუთრა.